Egjipt, ushtria mohon “grushtin e shtetit”

Më herët, ushtria bëri të ditur se mund t’u ofronte një “rrugëzgjidhje” për paqe, nëse presidenti islamik, Mohammed Morsi, dhe kundërshtarët e tij do të dështonin të merrnin parasysh “dëshirën e popullit”.

Ndërkohë, presidenti amerikan Barack Obama, që aktualisht po zhvillon një tur në Afrikë, i telefonoi zotit Morsi dhe i bëri thirrje atij që t’u përgjigjet shqetësimeve të protestuesve.

“Zoti Obama nënvizoi se kriza aktuale mund të zgjidhet vetëm përmes një procesi politik”, ka njoftuar Shtëpia e Bardhë përmes një njoftimi për shtyp.

Festime të zhurmshme ndodhën në Kajro, teksa protestuesit e interpretuan ultimatumin si dhënie fund të regjimit të presidentit Morsi. Të dielën, miliona vetë protestuan në mbarë vendin, duke i bërë thirrje presidentit të jepte dorëheqje.

Protesta masive vazhduan edhe gjatë së hënës, ndërkohë që 8 persona humbën jetën si pasojë e bastisjes së furishme nga ana e aktivistëve të zyrave të “Vëllazërisë Muslimane”, në Kajro, nga radhët e së cilës vjen edhe presidenti.

Ai u bë presidenti i parë islamik i Egjiptit, më 30 qershor 2012, pasi fitoi zgjedhjet e konsideruara të lira dhe të drejta, pas revolucionit të 2011-s, që rrëzoi nga pushteti Hosni Mubarak.

Në një deklaratë të lexuar në televizioni egjiptian, gjeneral Abdel Fattah al-Sisi, ministër i Mbrojtjes dhe kreu i Forcave të Armatosura, i përshkroi protestat si një shprehje e “paprecedent” e dëshirës së popullit.

Nëse kërkesat e popullit nuk do të përmbushen – tha ai – ushtria do të duhet të marrë përgjegjësinë për një plan mbi të ardhmen. Por, teksa ai shtoi se ushtria nuk do të përfshihet në politikë apo qeverisje, fjalët e tij u konsideruan nga shumë veta si një “grusht shteti”.

Top Channel