Libi, shfarroset njësia ushtarake elitë

Një burim pranë komandës ushtarake libiane në qytet tha për BBC se personat e armatosur kishin sulmuar selinë qendrore të njësisë elitë të forcave speciale.

Kjo më pas çoi në një shkëmbim të ashpër zjarri në zonë, shtoi burimi, që përfundoi me vrasjen e komandove.

Bengazi ishte qendra e kryengritjes që rrëzoi regjimin e kolonelit Muammar Gaddafi në vitin 2011. Tani është kthyer në një zonë të destabilizuar me përleshje mes milicive të formuara nga ish-rebelë dhe trupave zyrtare të autoritetit të ri shtetëror.

Milici me ideologji të ndryshme kontrollojnë pjesë të qytetit, që në muajt e fundit ka parë një valë sulmesh ndaj forcave qeveritare të sigurisë.

Faqja zyrtare në Facebook e forcave speciale tregon imazhe të frikshme të disa prej ushtarëve që humbën jetën në orët e para të mëngjesit të së shtunës.

Korrespondentja e BBC, Rana Jawad thotë se dy nga personat që mbetën të vrarë ishin ekzekutuar pasi ishin kapur të gjallë nga një njësi e identifikuar si grupi Takfir, referim i pastër për militantët islamikë.

Përleshjet e fundit shënojnë një përshkallëzim të sulmeve kundër njësive të forcave speciale që u vendosën në qytetin e Bengazit rreth një muaj më parë.

Top Channel