Britania, “embargo” teknikut të CIA-s

Lajmin e bën të ditur agjencia “Associated Press”, që i referohet një dokumenti që ka mbërritur në një aeroport tajlandez, ku kërkohet ndalimi i hipjes në çdo avion të 29-vjeçarit Edward Snowden.

Njoftimi në fjalë, që sipas burimit është dërguar nga Home Office, lë të kuptohet se zotit Snowden i refuzohet hyrja në Mbretërinë e Bashkuar. Për momentin Home Office nuk ka bërë asnjë koment.

Sipas “AP”, njoftimi është lëshuar ditën e hënë nga filialet e rrjetit të kësaj zyre. Dokumenti mbante një fotografi të Snowden, datën e tij të lindjes dhe numrin e pasaportës, raporton agjencia e lajmeve.

Në të thuhej: “Nëse ky individ përpiqet të udhëtojë drejt Mbretërisë së Bashkuar, autoritetet duhet të mos e lejojnë”.

Gjithashtu, në të paralajmërohen linjat ajrore se punonjësit e tyre mund të rrezikojnë shkarkime nga puna ose edhe burgim nëse e lejojnë personin të udhëtojë.

Sipas faqes zyrtare të Home Office, gjoba për një situatë të tillë do të ishte 2 mijë paund, ose 3.130 dollarë amerikanë.

Deri tani zyrat e linjave ajrore të Bangkokut, Singaporit dhe Malajzisë kanë konfirmuar se kanë marrë njoftimin, dërgimi i të cilit sipas “AP” nuk duhej të bëhej publik.

Top Channel