Jemeni njeh Kosovën

11/06/2013 16:25

Jemeni ka njohur zyrtarisht Kosovën si shtet të pavarur dhe sovran, ka bërë të ditur ministri i Jashtëm kosovar, Enver Hoxhaj, përmes një mesazhi të postuar në rrjetet sociale.

“Sapo bisedova me ministrin e Jashtëm të Jemenit, Abu Bakr Al Qirbi, i cili me konfirmoi vendimin e shtetit të tij për njohjen e Republikës së Kosovës”, ka shkruar Hoxhaj.

Njohja nga Jemeni vjen vetëm dy muaj pas vizitës së ministrit Hoxhaj në këtë shtet dhe pritet të ndikojë edhe tek vendet e tjera të Lindjes së Mesme që të njohin shtetin e Ballkanit.

Sipas njoftimeve të mediave kosovare, në ditët e ardhshme pritet që në Prishtinë të mbërrijë letra zyrtare e njohjes nga qeveria jemenase.

Republika e Jemenit gjendet në Azinë Perëndimore dhe ka një territor që përfshin tërë pjesën jugperëndimore dhe jugore të gadishullit arabik.

Shteti kufizohet me Arabinë Saudite në veri, me Detin e Kuq në perëndim, me Gjirin e Adenit dhe Detin Arab në veri dhe Omanin në lindje. Kryeqytet i Jemenit është Sana, ndërsa popullsia e tij është rreth 23 milionë e 833 mijë banorë.

Top Channel