Ushtari amerikan pranon masakrën

06/06/2013 00:00

Ushtari amerikan Robert Bales ka shmangur dënimin me vdekje për vrasjen e
16 civilëve afganë vitin e kaluar, pasi një gjykatë ushtarake pranoi
vetëdeklarimin e tij fajtor.

Më herët Bales pranoi vrasjen e civilëve afganë, duke thënë se, “nuk kishte një arsye të fortë në botë për të kryer atë masakër”.

Ai tha se ishte larguar nga baza amerikane në provincën e Kandaharit dhe kishte sulmuar dy fshatra në afërsi të saj në orët e para të marsit 2012.

Një juri do të vendosë tani nëse dënimi me burgim të përjetshëm do të përmbajë mundësinë e lirimit me kusht. Seanca ku do të jepet vendimi është caktuar për më 19 gusht.

Gjyqtarit, njëkohësisht komandantit të bazës ushtarake në shtetin e Uashingtonit ku u mbajt seanca, iu kërkua që të pranonte çdo marrëveshje që do të vinte nga pranimi i fajit nga marinsi.

Në fillim të seancës, ditën e mërkurë, gjyqtari i çështjes, koloneli Jeffrey Nance i kërkoi Bales që të përshkruante motivet përse ndihej fajtor. Ushtari lexoi një deklaratë ku përshkruante në detaje çdo vrasje të kryer:

“U largova nga baza dhe shkova në fshatin e afërt Alkozai. Teksa ndodhesha atje, pash një femër që ishte ‘Naikmarga’. Isha i vendosur të vrisja një ‘Naikmarga’ dhe e vrava duke e qëlluar me armë zjarri. E kreva këtë veprim pa asnjë justifikimi ligjor, zotëri”, tregoi marinsi duke iu drejtuar trupit gjykues.

I pyetur përse i kreu vrasjet, ai u përgjigj: “Zotëri, këtë pyetje ia kam bërë vetes miliona herë që atëherë. Nuk ka asnjë arsye të fortë në këtë botë përse unë bëra ato gjëra të tmerrshme”.

Top Channel