Argjentinë, vdes ish-udhëheqësi i grushtit të shtetit

Autoritetet argjentinase njoftuan se ai ndërroi jetë në burgun ku po vuante dënimin përjetë. Videla, që udhëhoqi juntën ushtarake deri në vitin 1981, u dënua në vitin 2010 pas gjetjes fajtor për torturimin dhe vrasjen e 31 disidentëve të diktaturës ushtarake.

Më shumë se 30 mijë argjentinas janë torturuar, internuar dhe vdekur gjatë viteve të juntës ushtarake, në atë që vendi e njeh si “lufta e pisët”.

Në vitin 1985, dy vjet pas rrëzimit të pushtetit të ushtarakëve, Videla u arrestua dhe u dënua me burg përjetë për akuzën e vrasjes dhe torturës. Por në vitin 1990 u la i lirë nën amnistinë e presidentit të asaj kohe, Carlos Menem.

Në prill të vitit 2010, Gjykata e Lartë argjentinase mori në shqyrtim dosjen e një gjykate federale dhe akuzat e reja të ngritura kundër tij kishin të bënin me pjesëmarrjen personalisht në torturimin dhe vrasjen e 31 disidentëve.

Tetë muaj nga nisja e procesit, Videla u gjet fajtor për torturimin dhe vdekjen e 31 të burgosurve politikë në burgun e Kordobas dhe u dënua me burg përjetë.

Pak pas marrjes së pushtetit nga junta ushtarake në vitin 1976, shumë prej aktivistëve të së majtës, u nxorrën nga qelitë e burgut të Kordobas dhe u pushkatuan. Në ato vite, udhëheqësit ushtarakë u mbrojtën duke deklaruar se ata u vranë gjatë përpjekjeve për t’u arratisur nga burgu.

Vec akuzës së torturës dhe vrasjes, ndaj Videlas rëndonte ndër vite edhe akuza e grabitjes së foshnjeve të porsalindura nga ciftet e disidentëve që mbaheshin në kampet e internimit. Besohet se 400 fëmijë të aktivistëve të majtë janë zhdukur gjatë kësaj periudhe.

Ndërkohë, një tjetër ish-ushtarak i lartë pjesëmarrës në grushtin e shtetit, Reynaldo Bignone u dënua me 15 vjet burg për rolin e tij në këto krime. Në total, numri i ushtarakëve të dënuar që udhëhoqën Argjentinën nga 1976-1983 shkon rreth 30.

Top Channel