Pakistan, mbyllet fushata zgjedhore

Zgjedhjet do të shënojnë të parin tranzicion pushtetesh në vend nga një qeveri civile te një tjetër, në gjithë historinë 66-vjeçare të vendit.

Gjithsesi, përgatitjet për zgjedhje janë penguar nga dhuna, pas të cilës më shumë se 100 persona kanë vdekur. Të enjten, djali i ish-kryeministrit, Yusuf Raza Gilani, u mor peng gjatë një mitingu elektoral.

Ali Haider, një kandidat për partinë Popullore të Pakistanit (PPP), u mor peng në qytetin qendror të Multan-it, tha ish-kryeministri Gilani. Fundi i fushatës u karakterizua nga lutjet emocionale të disa prej kandidatëve.
 
Nawaz Sharif, i cili udhëheq partinë opozitare “Liga Muslimane Pakistaneze N” (PML-N) dhe që parashikohet të jetë kryeministri i ardhshëm i Pakistanit, bëri një lutje pasionante ndaj turmës në Lahore, vetëm pak minuta nga mesnata.

“Nëse na jepni 5 vjet, do të shikoni se ne mund të ndryshojmë fatin e këtij vendi”, tha ai. Ai akuzoi kundërshtarët e tij se kanë shitur nderin e kombit dhe u zotua se partia e tij do të jetë ndryshe.

Ish-lojtari ndërkombëtar i ckicket-it, Imran Khan, lider i partisë “Lëvizja për Drejtësi”, iu drejtua mbështetësve në kryeqytetin Islamabad me anë të një video-konference nga krevati në spital.

Ai ishte plagosur pasi kishte rënë nga një ashensor i improvizuar në një miting elektoral, më herët gjatë kësaj jave. “Zoti nuk do të më marrë nga kjo botë, pa u ndërtuar Pakistani i ri”, tha ai.

Në periferi të Islamabad-it, mbështetës të PPP-së mbajtën gjithashtu një miting të madh. Lideri i partisë, Bilawal Zardari Bhutto, djali i kryeministres së vrarë, Benazir Bhutto, dhe presidentit aktual, Asif Ali Zardari, iu drejtua mbështetësve gjithashtu përmes një video-konference.

“Benazir dha jetën e saj për këtë komb, për këtë vend, për njerëzit dhe demokracinë, si dhe për përfundimin e kësaj beteje”, tha ai. “Ndërsa babai im, presidenti i Pakistanit, Asif Ali Zardari, i cili ka kaluar 10 vite në burg, ka thënë gjithmonë se duhet të vendosim Pakistanin para gjithçkaje. Tashmë është detyra jonë të përmbushim këtë premtim”.

PPP-ja, së bashku me Lëvizjen Quami Muttahida (MQM) dhe Partinë Kombëtare Aëami (ANP), kanë qenë objektiva të sulmeve nga talebanët. Kërcënimet e dhunshme kanë detyruar këto 3 parti të kufizojnë në maksimum eventet para zgjedhjeve.

Dhjetra mijëra ushtarë do të vendosen nëpër qendrat e votimit të shtunën, pasi talebanët kanë kërcënuar për akte vetëvrasëse. Sondazhet theksojnë se do të jetë një pjesëmarrje rekord, më shumë se 44% që ishte në zgjedhjet e 2008-s.

Top Channel