G8 dënon Korenë e Veriut

Në deklaratën e përbashkët të lëshuar pas përfundimit të takimit, ministrat e G8 kërkojnë nga Peniani që fillimisht t’i japë fund provokimeve e të heqë dorë nga testimet e mëtejshme bërthamore dhe ato të raketave balistike me rreze të mesme e të gjatë veprimi.

Kërkesa për daljen me një deklaratë mbi rritjen ndjeshëm të tensioneve në rajon u bë nga Japonia e cila së bashku me Korenë e Jugut dhe bazat amerikane në rajon kanë qenë në qendër të kërcënimeve të vendit komunist.

Peniani ka zhvendosur dy raketa balistike Musudan në brigjet lindore të vendit. Rrezja e tyre e fluturimit varion, por disa analistë dhe ekspertë ushtarakë thonë se mund të shkojë deri në 4000 mijë kilometra duke përbarë një rrezik potencial për Japoninë, Korenë e Jugut dhe ishullin amerikan të Guamit në Paqësor.

Gjatë punimeve grupi u ndal edhe tek kriza siriane dhe programi bërthamor iranian. Në lidhje me Sirinë, në deklaratë shprehet shqetësimi për krizën humanitare që ka përfshirë vendin, ndërsa Iranit i bëhet ftesë të heqë dorë nga ambiciet e tij bërthamore e të ulet në tryezën e bisedimeve dhe të lejojë mbikqyrjen e Agjencisë Ndërkombëtare të Energjisë Bërthamore pa kushte në centralet e tij.

Top Channel