Një shtetas australian, i rrëmbyer 15 muaj më parë nga një grup i lidhur me Al Kaedën në Filipine, është liruar.
Në pamje të parë i dobësuar, Warren Rodwell u lirua ditën e shtunë në afërsi të qytetit Pagadian, në jug të Filipineve, kanë komunikuar autoritetet lokale.
Ai ishte rrëmbyer nga militantët e grupit Abu Sayaf në vitin 2011 dhe për herë të fundit ishte shfaqur i gjallë në një video të postuar në një rrejet social në dhjetor.
Aby Sayyaf konsiderohet lëvizja ekstremiste më e vogël por më radikale që vepron në jug të ishujve aziatikë.
Ministri i Jashtëm australian, Bob Carr mirëpriti lajmin, duke thënë se lirimi kishte qenë rezultat i përpjekjeve të autoriteteve nga të dyja vendet.
“Qeveria filipinase kishte rolin kryesor në këtë çështje dhe ajo meriton përgëzime për përpjekjet e palodhshme për lirimin e zotit Rodwell”, deklaroi ministra Carr.
Ai shtoi se Rodwell është transferuar në një lokalitet të sigurtë dhe se fokusi tani është rekuperimi shëndetësor i tij.
Australiani, që drejton një dyqan me bashkëshorten e tij në qytetin bregdetar të Filipineve, Ipil, ishte rrëmbyer në dhjetor të vitit 2011.
Një numër jo i vogël të huajsh janë rrëmbyer në jug të Filipineve, për lirimin e të cilëve është kërkuar një shpërblim financiar.
Qeveria australiane ka prej kohësh një politikë që refuzon pagesën e shpërblimeve të tilla për qytetarët e saj. Zonat në rajonin jugor përdoren si baza nga militantët islamikë dhe rebelët.
Top Channel
