Brazil, 16 të akuzuar për zjarrin në diskotekë

Më shumë se 240 vetë mbetën të vrarë, kur shkumba izoluese mori zjarr dhe shpërndau tym toksikues në ambientin e mbyllur, në qytetin jugor të Santa Marias.

Policia tha se zjarri ra kur një këngëtar i një bande muzikore po mbante një fishekzjarr ngjitur me tavanin, i cili më pas nisi të shkrumbohej.

Këngëtari, producenti i grupit, pronarët e klubit dhe zyrtarë të zjarrëfikësve do të akuzohen për vrasje nga pakujdesia.

Një raport i policisë, i publikuar të premten, bënte të ditur se një duzinë dëshmitarësh raportuan se kishin parë këngëtarin në skenë duke mbajtur fishekzjarrin, i cili shkaktoi zjarrvënien.

Shumë dëshmitarë thanë se rojet e sigurisë në klubin e natës “Kiss”, fillimisht u përpoqën të ndalonin njerëzit, që po synonin të largoheshin. Fakti që klubi kishte vetëm një derë daljeje, u përshkrua nga hetuesit gjatë përpilimit të raportit si një “dështim grotesk i sigurisë”.

Rrugët e shpëtimit dhe ndriçimi në klub rezultuan të ishin të pamjaftueshme, ndërkohë që ai ishte i mbipopulluar. Dëshmitarë thanë se aty ishin gati 1000 të pranishëm, në një kohë që klubi kishte një licencë për jo më shumë se 800.

Top Channel