Berlusconi bën thirrje për zgjedhje të reja

Rreth 300 mijë “berluskonianë”, kjo sipas organizatorëve, zbarkuan rreth orës 15:00 në Sheshin e Popullit në Romë me parrula “Duart larg nga Berlusconi”, duke iu referuar vendimeve të fundit të drejtësisë italiane që kanë patur në qendër të tyre pikërisht ish-kryeministrin “e 1001 cështjeve gjyqësore”, që nga ato që lidhen me evazionin fiskal, e deri tek ato për favorizim prostitucioni.

“Jemi të gjithë të karikuar për një tjetër fushatë elektorale dhe këtë herë do të fitojmë me të vërtëtë. Na quanin të mbaruar, por sot ja ku jemi. Jemi këtu në këtë shesh të mrekullueshëm”, nisi fjalën e tij “Kavaljeri”.

Më tej ai sulmoi liderin e së majtës, Bersani i cili të premten mori mandatimin për formimin e qeverisë së re nga ana e presidentit Napolitano.

“Nëse Bersani vazhdon përpjekjet e tij për të formuar një qeveri minorance, ta dijë që kundërshtimi ynë do të jetë i ashpër, në parlament dhe në rrugë e sheshe. Nëse nuk do të formojë qeverinë e re, atëherë unë i them të mos na humbasë kohë dhe të lënë vendin të shkojë drejt zgjedhjeve të reja sa më parë”, deklaroi ai.

Akuzave të ish-kryeministrit nuk i shpëtoi as Monti dhe qeveria e tij, ende në detyrë. Kjo është besueshmëria e tyre?, tha Berlusconi, duke kundërshtuar dorëzimin tek autoritetet indiane të dy marinarëve italianë që akuzohen për vrasjen e një peshkatari indian.

“Kavaljeri” u ndal te emërimet e fundit në parlament ku dy dhomat e tij kryesohen nga e majta, ku Berlusconi fut edhe lëvizjen M5S të komedianit Beppe Grillo.

“Pas presidencës së Dhomës e Senatit, edhe Presidenca e Republikës duhet të shkojë tek e majta? Kjo është e papranueshme për ne. Bersani, Vendola, Casini dhe Monti s’mund të zgjedhin presidentin e ardhshëm. Kreu i shtetit duhet të jetë i qendrës së djathtë. Kjo është një e drejtë e shtenjtë. Ata s’mund të na përjashtojnë nga institucionet e shtetit”,  akuzoi Berlusconi.

Top Channel