Libi, dhjetëra të vdekur nga alkooli metilik

378 persona janë shoqëruar me helmime të shkallëve të ndryshme në spital që prej së shtunës, ndërsa numri i viktimave dhe të helmuarve të tjerë pritet të rritet ndjeshëm në orët në vazhdim.

Një pjesë e atyre që konsumuan substancën po trajtohen me dializë, për të shmangur daljen e veshkave jashtë funksionit (insufiçencë renale), ndërsa dhjetëra të tjerë rrezikojnë të mbeten të verbër.

Fluksi i të helmuarve detyroi Tripolin zyrtar të shpallte gjendjen e jashtëzakonshme në spitalet e kryeqytetit, ndërsa për shkak të mbipopullimit, një pjesë e të prekurve janë dërguar për trajtim në Tunizinë fqinje.

Si një vend musliman, Libia e ka të ndaluar tregëtimin e alkoolit, por shumë pije alkoolike prodhohen në mënyrë artizanale nga fshatarët, duke u tregëtuar pa asnjë lloj kontrolli në tregun e zi.

Alkooli metilik, që gjen përdorim të gjerë si katalizator në industri, në solucione pastrimi apo antifrizë, ka veti të ngjashme kimike dhe fizike me etanolin e zakonshëm, por është vdekjeprurës për trupin e njeriut.

Edhe sasi të vogla të metanolit janë në gjendje të shkaktojnë vdekjen nga insufiçenca respiratore apo renale, ndërsa verbimi për shkak të dëmtimit të nervit optik apo dëmet e përhershme nervore janë të zakonshme midis të mbijetuarve.

Top Channel