Berisha: Të ulim moshën e votimit

Por, me një lëvizje surprizë vetëm 105 ditë përpara ditës së zgjedhjeve, kryeministri Sali Berisha propozoi uljen e moshës së votimit për të rinjtë, kur i kërkoi kreut të deputetëve demokratë të nisë negociatat me opozitën për të pranuar këtë propozim.

“Do t’i kërkoja kreut të grupit parlamentar demokrat që të takojë kreun e grupit të PS-së, Gramoz Ruçi dhe krerët e grupeve të tjera parlamentare për të diskutuar uljen e moshës së votimit në 16 vjeç. Janë me qindra të rinj, të cilët më pyesin se përse ata nuk votojnë”, deklaroi Berisha.

Shumë pak vende në botë e kanë moshën e votimit duke nisur nga 16 vjeç, ndër më kryesoret, Austira në Europë dhe Brazili në Amerikën e Jugut.

Pak javë më parë një debat i tillë u hap nga liberalët britanikë, por nuk u pranua nga kryeministri konservator David Cameron, partia e të cilit e konsideroi nismën e liberalëve një përpjekje për t’u dukur “trendy” dhe për të siguruar mbështetje mes të rinjve.

Një analizë e tillë mund të jetë e përshtatshme edhe për të përkufizuar nismën e kryeministrit Berisha për uljen e moshës së votimit nga 18 në 16 vjeç. Megjithatë, sipas kryeministrit, rinia shqiptare është konsideruar e pjekur që në traditën më të hershme të shoqërisë.

“Po të rrimë ta mendojmë thellë, moskonsiderimi i tyre dëshmon një prapambetje në kohë të gjykimit tonë për ta. Kjo është gjeneratë, e cila u mësua që në ditët e para të jetës me lirinë dhe vlerat e saj”, theksoi Berisha.

Top Channel