Topi: Me PD na ndan Berisha, me PS ideologjia

Në këto kushte, Meta, Dule, Spahiu, Idrizi, Bamir Topi apo të tjerë mund të rezultojnë aktorë përcaktues për fatet e vendit.

Nga ana e saj, Fryma e Re Demokratike po identifikohet në opinion dhe nga sondazhet tashme jo thjesht me ish-presidentin, por me një forcë të qendrës së djathtë që përmbledh reformën, zemërimin dhe strukturat e alternatives së djathtë.

Por, çfarë do të bëjë fraksioni me i madh i partisë demokratike tashme në opozite? A mbetet për ta thjesht mision rrëzimi i Berishës apo edhe një program ndryshe i të djathtes?

A do jete FRD një opozitë e fortë siç i sugjeron me ironi kreu i Partisë Socialiste apo do të jetë vendimmarrës për fatet e qeverisë së ardhshme?

Për të gjitha këto pyetje, kreu i FRD-së, Bamir Topi, dha përgjigje në një intervistë eksluzive përballë Sokol Ballës, në emisionin e përjavshëm politik të së enjtes, “Top-Story”.

Sokol Balla – Zoti Topi, përshëndetje dhe mirëseerdhët në studio. Sondazhet tregojnë për momentin një fuqizim të FRD-së si element i fuqishëm elektoral. Por, a keni diçka përtej fasadës së sondazheve për të treguar që FRD nuk është me të vërtetë një fasadë?

Bamir Topi – Ky është një moment kur duhet të jemi konkretë dhe jo të varur nga sondazhe që në Shqipëri nuk kanë kredibilitet, aq më shumë kur sondazhet futen nga disa subjekte për të denatyruar flukset elektorale. Si politikan dhe njeri me eksperiencë, shoh tendenca të qarta në elektoratin shqiptar. FRD do të jetë një forcë e rëndësishme në vendimarrjen parlamentare, por edhe në qeverinë e ardhshme.

Sokol Balla – Megjithatë, cila është forca reale elektorale e partisë suaj?

Bamir Topi – Nëse i referohemi kohës që u krijua FRD, duke marrë në konsiderratë futjen time në këtë subjekt, ende nuk janë bërë gjashtë muaj, por në këtë kohë ndërkohë partia është struktuar në të gjithë vendin. FRD ka dëshmuar në këtë periudhë të shkurtër se është shpërndarë kudo, e ne bëjmë takime pa transportuar njerëz nga Tirana, edhe sepse është në interesin tonë që të shohim cila është mbështetja në të gjithë qelizat e territorit.

Sokol Balla – Sondazhet tregojnë se votuesit tuaj vijnë nga gardhi i PD-së. A e bën kjo misionin tuaj të limituar në një drejtim apo FRD është një parti që shkon përtej origjinës së saj, fraksionit të shkëputjes nga partia e madhe?

Bamir Topi – Në eksperiencën time, unë si qytetar, e si politikan nuk jam mësuar të futem tek gardhi i të tjerëve, por dua të them se FRD nuk është një linjë që del nga ajo parti në mënyrën më absolute. Tendenca për të krahasuar me disa lëvizje të tjera që kanë ndodhur në retroskeptivë është e gabuar. Gjysma e zgjedhësve nuk votojnë, janë pa dyshim emigrantët, por edhe indiferentët apo alergjikët nga politika, nga qeverisja e radhës dhe këtë e kam vërtetuar personalisht në 2005-n. Fakti që në atë kohë mora mbi 50% të votuesve që isha votuar tradicionalisht, tregon se ka gjithmonë një kontigjent votuesish që janë të fshehur, por që presin një projekt dhe profil të ri të caktuar politik. Të mos marrësh pjesë në zgjedhje, sigurisht nuk është gjë e mirë. Është thënë shpesh në Shqipëri se duhet zgjedhur e keqja më e vogël midis dy altenativave. Njerëzit zgjedhin të keqen më të vogël ose nuk votojnë sepse s’ka tjetër alternativë. Por, tashmë ka një alternativë më shumë, ne jemi një parti e qendrës së djathtë, kemi një program të qartë, që do të marrë formën zyrtare në gjysmën e dytë të muajit prill dhe kjo do të jetë kontrata politike që do të kemi me shqiptarët.

Sokol Balla – Qëndrojmë tek programi i FRD-së, zoti Topi. Sondazhet tregojnë se arsimi e shëndetësia janë probleme që shqetësojnë qytetarët, por jo aq shumë sa korrupsioni, papunësiia dhe qeverisja e dobët. Cilat janë pikat bazë të programit për këto pika?

Bamir Topi – Ka vende me ekonomi të zhvilluar, por pa demokraci funksionale. Ekonomia është shumë e rëndësishme, por kryesorja është shteti i së drejtës dhe demokracia funksionale. Pa dyshim që shteti ekziston mbi bazën e disa standarteve të zhvillimit të shoqërisë, ndaj shtylla e dytë është ekonomia, ku jemi futur konkretisht tek shëndetësia, prona, arsimi, të përndjekurit politikë, prioritetet kombëtare si bujqësia, agroindustria, turizmi dhe pastaj tek programi social. Pra, është një program shumë i struktuar dhe i ndërtuar nga eksperiza e specialistëve të shumtë, duke marrë formën e një drafti dhe është një program, besoj, ndryshe nga i partive të tjera, është një program konkret. Tek demokracia funksionale dhe shteti i së drejtës, kryesorja janë zgjedhjet, që projektimi në Parlament të jetë i vërtetë.

Sokol Balla – Në këtë kuadër ju keni bërë edhe disa propozime…

Bamir Topi – Ne kemi bërë një propozim që nuk shkojnë me këtë frymë zgjedhjesh, që janë aktuale nëse do të bëhen ndryshime kushtetuese. E para, Kuvendi duhet të ketë ndryshime kushtetuese. Nga 140 deputetë duhet të ketë 100. Shqipëria është një vend i vogël, aq më shumë nga eksperienca kemi parë që vetëm një grup deputetësh janë aktivë. Pjesa tjetër janë kthyer në instrumenta të kryetarëve të partive që vetëm ulin e ngrenë dorën. Parlamenti si vlerë, ka regres të dukshëm dhe ka dalë nga funksionaliteti i tij. Në të gjitha rastet është nën influencën direkte të ekzekutivit, pra këtu ndodh e kundërta nga ajo që duhet të ndodhë në një shtet normal, ku sistemi ligjvënës i imponohet ekzekutivit. Plus, mekanizmi i 71 votave sot jep një pushtet të plotë. Ne kemi propozuar që të gjithë votimet për institucionet të jenë me 2/3. Të gjitha këto vijnë si meritë e atyre ndryshimeve të pamenduara kushtetuese. Ndoshta, kryetarit të opozitës ia kujtoj shpesh, por ja kujtoj se nuk ka vënë mend, pasi ra dakord prapë të mbajë në fuqi një kod zgjedhor, që nuk merr parasysh barazinë e votës.

Sokol Balla – Ajo që konstatoj unë si gazetar është se ju dhe zoti Rama keni shtuar tonet indirekte mes jush. Kjo lloj retorike midis jush, si dy pjesë të opozitës, duket sikur kënaq strategjinë e mazhorancës për të përçarë opozitën.

Bamir Topi – Nuk do të kishte asnjë lloj shansi mazhoranca të bënte ato ndryshime, pa mbështetjen e opozitës. Kemi të freskët rastin kur u modifikua kodi zgjedhor dhe vazhdon e njëjta psikologji, të njëjtat kompromise në dëm të të tjeravë, pasi duan që të dominojnë skenën politike. Kush e ka thënë që duhet të jenë vetëm këto dy parti, vazhdimisht në këtë gjendje. E gjithë politika botërore ka treguar se ajo është dinamike, projeksioni dhe partitë politike janë në lëvizje, siç është mënyra se si e ndien qytetari. Më duket ama sikur ka një bllok politik, një marrëveshje e fshehtë mes dy personave që duan të monipolizojnë politikën, shto media që i shkon mbrapa, zërat e tretë bëhen shumë më pak të fuqishëm. Këtë e kam thënë gjithmonë, edhe kur nuk kisha asnjë interes e as projeksion në një parti politike. Një zë i ri është gjithmonë i domosdoshëm, ndërsa kjo është një politikë që çimenton të keqen brenda sistemit, një kënetë që shumëfishon sëmundjen. Rotacion nuk është ik ky të vijë ai, por edhe përfshirja e intelektualëve që s’duan të jenë pjesë e politikës që të demotivon dhe të denatyron. Kjo është arsyeja që unë kam parë dhe dëgjuar oferta për intelektualë, që kanë refuzuar pasi nuk duan të jenë instrumentë të kësaj politike. Rotacion duhet të përfshirë edhe gjeneratat e reja.

Sokol Balla – Ka
gjithmonë një rrugë të tretë po thoni?

Bamir Topi – Patjetër që ka, siç ka për të shkuar tek “TEG”-u tre rrugë të
ndryshme. Sigurisht që ka nevojë për rrugë alternative që japin mundësi për një
politikë të drejtëpërdrejtë për shqiptarët, të cilët janë futur të gjithë në një
stad, siç ishte viti 1992.

Sokol Balla – A ka nevojë vendi për një pol të tretë

Bamir Topi – Çështja e emërtimit pol apo bllok është tjetër. Të flasësh në
parim për një rrugë të tretë është e natyrshme, ndërsa të flasësh për pol, është
në funksion të një konjukture të caktuar.

Sokol Balla – Le të flasim për konjukturat. Vetë zoti Dule, në këtë studio,
foli për mundësinë e krijimit të një poli të tretë. Ai ju përmend ju dhe midis
jush duket se ka patur gjithmonë një respekt reciprok. Është folur edhe për
LSI-në, e ju me Metën keni pasur gjithmonë një marrëdhënie korrekte. Meqë ra
fjala, a jeni takuar me zotin Meta së fundmi?

Bamir Topi – Po, jemi takuar në një rast së bashku me disa miq, konsumuam një
bisedë normale dhe të përgjithshme, e jo me terma konkretë. Kjo ka qenë hera e
vetme së fundmi.

Sokol Balla – Nuk u futët në terma konkretë sepse gjykoni që është ende herët?

Bamir Topi – Jo, nuk kishte lindur kjo nevojë. Nuk jam këtu në studio për të
ruajtur në vetvete një mister, do të jemi të lirë të takohemi sërisht. Por, nga
një takim, tek kalimi i bisedave për të krijuar një aleancë dhe një pol, këto
janë biseda më të komplikuara. Sot nuk kemi absolutisht asnjë opsion në këtë
moment që flasim, pasi pavarësisht se jam kryetari i një force politike, nuk do
të kisha marrë guximin të vija në studio dhe të flisja diçka të pakonsultuar me
kolegët e mi.

Sokol Balla – Duket e drejtë që duhet të konsultoheni, pasi të paktën dy anëtarë
të kryesisë së FRD-së, Biberaj dhe Krasniqi, janë shprehur parimisht kundër
aleancës me LSI-në për shumë arsye.

Bamir Topi – Ju e dini që ne jemi një parti ku ekziston dhe respektohet një
liri relative. S’mund të them absolute se nuk e kam as unë në cilësinë e
kryetarit. Ata kanë të drejtë të kenë opinionin e tyre, janë shumë të
respektuar. Megjithatë, unë në rolin e kryetarit të partisë, ndonëse kam këtë
rol, nuk më shkon në mendje se si mund të përcaktoj diçka të tillë, pa u
konsultuar me strukturat, që janë ato që duhet të marrin këtë dhe çdo
vendimarrje të tillë të rëndësishme. Natyrisht, në çdo rast do të ketë një
konsultim paraprak shumë të maturuar.

Sokol Balla – Pra, nuk e përjashtoni mundësinë e një poli të ri të qendrës?

Bamir Topi – Në emër të FRD-së kam përjashtuar koalicionin me partitë e vjetra,
por në parim, gjithçka tjetër është e hapur. Por, nëse e specifikojmë sot do të
ishte gabim. Më e rëndësishmja për ne sot është konsolidimi dhe vazhdimi i krijimit
të një fizionimie të FRD-së.

Sokol Balla – Ju keni deklaruar më parë në këtë studio që do të hynit të vetëm
në zgjedhje.

Bamir Topi – Në politikë nuk ka absolutizëm, por kam thënë se me një
probabilitet të lartë, ne kemi ende mendimin që ndoshta me shumë mundësi do të
kandidojmë vetëm në zgjedhjet politike. Sigurisht, brenda kufijve të
relativitetit gjërat lëvizin.

Sokol Balla – Ka disa pyetje se si do t’i ruani ju votat, duke paragjykuar kështu
procesin zgjedhor ende pa nisur.

Bamir Topi – Kush dyshon që procesi në Shqipëri nuk do të jetë i ndershëm
sikurse e premton sikurse kryeministri në detyrë? (qesh) Kush? Interesante është
kjo, me këdo bisedon e njëjta pyetje. Më vjen mirë që e bëtë këtë pyetje, që i përket
mjedisit të përditshëm shqiptar, ambienteve të politikës, por që të bëhet edhe
nga faktorë të rëndësishëm ndërkombëtarë. Përderisa të gjithë kanë këtë pyetje,
që këtu procesi i zgjedhjeve është i kompromentuar, të gjithë aktorët, e madje
shumë të rëndësishëm bëjnë këtë pyetje. Ka një retroskeptivë të errët me
zgjedhjet. Ekziston i njëjti problem e fobi për zgjedhjet e qershorit, pra në
sfond është një personazh të cilin ndonëse nuk e themi, e njohim të gjithë që dëshiron
në mënyrë të përsëritur të fusë duart në zgjedhje, duke i futur vazhdimisht, siç
kanë bërë edhe socialistët në 2001-n. Ata përdorën atëherë mekanizmin e Gjykatës
Kushtetuese, pra askush nuk është dorëjashtë në këtë punë dhe këto janë
probleme të demokracisë së brishtë shqiptare e kjo është arsyeja përse në
slloganin tonë kemi thënë fund tranzicionit, pas 22 vitesh kemi nevojë t’i
japim fund kësaj. Duhet t’i vijë fundi psikologjisë së mashtrimit dhe një
mentaliteti primitiv që e sheh shtettin në formë tribale.

Sokol Balla: Në zgjedhje do të futeni në koalicion, në aleancë apo të vetëm, sepse nga sondazhet…

Bamir Topi: Ne vazhdojmë të forcohemi, konsolidohemi si forcë politike dhe themi që gjithcka ia lëmë ditëve në vazhdim. Por ajo që zotëron në mendimin politik është që mundësia më e madhe është që Fryma e Re Demokratike do futet e vetme në këto zgjedhje.

Sokol Balla: Synimi është rrëzimi i kësaj mazhorance, të paktën nga ajo që thatë ju. Atëherë pse nuk e pranoni ftesën e PS për të formuar një bllok opozitar?

Bami Topi: Nuk besoj që një filozofi e re ngrihet për qëllime kaq të vogla. Në lidhim një kontratë politike më shqiptarët, kemi një program të qartë dhe nëse do të ketë rotacion ose jo këtë e kanë në dorë shqiptarët,. Përpjekja për t’i zgjidhur gjërat në tavolinë është e gabuar. Gjëja më e rëndësishme është kolona e parë, pastaj futemi tek cështja e ekonomisë, nuk mund të bëhet fjalë për ekonomi nëse të qendron mbi kokë hija e rëndë e një pushtetit despotik.

Sokol Balla: Aleancë pas zgjedhjeve më PD?

Bamir Topi: Gjëja e fundit që unë rendis në atë listën e bibliografisë politike që t’i referohem është zëri i Sali Berishës. Me këtë personazh të politikës unë personalisht kam mbyllur cdo lloj opsioni të bashkëpunimit politik. Natyrisht nuk kam qenë unë shkaktari, ka qenë dhe vazhdon të jetë ai shkaktari i këtij komunikimi. Keni parë se sa qesharak bëhet në shfrytëzimin e atyre tavolinave institucionale. Të më thuash se cili është shansi i bashkëpunimit me Sali Berishën mund t’ju them që është një shans matematikisht zero. Kam parë tek ai një metamorfozë që ka qenë shumë e mundshme për t’u parë nga unë, vetëm e vetëm në shërbim të pushtetit të tij. Një sjellje arrogante madje unikale në të gjithë komunikimin politik, për sa ne kemi mundësi të njohim në rajon e më gjërë. Aq më shumë që në këndvështrimin tim dhe FRD ai është personazhi kryesor i tradhëtimit të interesave mbi të cilat u ngrit PD. Sot ai konsumon pushtetin e tij. Për ne është i amortizuar, nuk ofron asgjë. Fakti nëse përmend ose jo FRD… ju siguroj që nuk e përmend sepse e ka fobi, dhe mbi të gjitha është një personazh që sondazhet e tregojnë kapitullues në zgjedhjet e 23 qershorit. Përsa kohë sondazhet orientohen nga individë politikë dhe shikon që brenda 1-2 javë shifrat rrëzohen, por nuk është e vështirë të shohësh si ndjehen shqiptarët.

Sokol Balla: A keni një koment për rikthimin e Eduard Selamit në PD?

Bamir Topi: No Comment! Po e them në anglisht që ta kuptojë edhe zoti Selami se ndoshta ka harruar shqipen. Dua të ruaj atë komunikim civil dhe korrekt që kam patur. Gjithcka e ka marrë ai përsipër dhe e interpreton vetë. Nëse gjërat do të shkojnë në këtë sens e dinë shqiptarët.

Sokol Balla: Edhe LZHK iu bashkua PD…

Bamir Topi: Secili ka të drejtën të zgjedhë opsionin në funksion të zgjedhjeve.

Sokol Balla: Koalicion me PS…

Bamir Topi: Ne jemi shprehur për asnjë koalicion parazgjedhor me këto parti të vjetra. Të futesh në zgjedhjet politike nuk do të thotë të futesh inferiorë. Ne jemi parti e qendrës së djathtë, nëse ka një parti politike që i ka qendruar vlerave të qendrës së djathtë jemi ne. Më është dashur që si president të jem president i të gjithëve, por ama në disa zgjedhje kam qenë shumë i ndjeshëm.

Sokol Balla: Aleancë me PD pa Sali Berishën?

Bamir Topi: Nëse situata politike do të vijë në një funksion të një barazpeshimi të vendimmarrjeve politike, padyshim pa këtë personazh absolutisht po. Kam rastin të them që në 2005 ishim ne një grup njerëzish me një fizionomi tjetër që e rikthyem në pushtet këtë zotëri. Do të shikoni që zgjedhjet e 23 qershorit ai është kapitullues. Zgjedhjet e 2005 përcaktuan një mazhorancë të thjeshtë. Pa u zgjedhur president kam patur polemika të forta rreth mënyrës të vendosjes së kandidaturës për president. Në të gjitha këto ai s’ka lënë asgjë për t’u patur në vëmendje dhe për të qenë një aleat. Është një aleat i pavlefshëm dhe do të jetë i pavlefshëm përshkak të rënies së tij në opozitë.

Sokol Balla: Aleancë pas zgjedhjeve me PS?

Bamir Topi: Ne kemi qëllim kryesor të paraqitemi mirë në zgjedhje. Ajo që ne presim është krijimi i një grupi solid parlamentar të FRD-së, të gjitha llogaritë na cojnë drejt kësaj premise dhe pastaj vendimmarrjet do të jenë në funksion të interesit të vendit. Shqipëria të ketë një demokraci funksionale, një qeveri që do të na cojë realisht në BE dhe kontribut në këtë politikë të trazuar.

Sokol Balla: Ka një ashpërsim të kritikave mes jush dhe Ramës

Bamir Topi: Kur paraqitëm programin, Ramën e kam konsideruar një bashkëautor të kësaj katrahure. Me Ramën nuk bëjmë koalicion sepse është parti e majtë. Ne kemi parimet e një qendrë të djathtë. Rama ka qenë në opozitë dhe nuk mund t’i jap të njëjtën peshë për dhunimin e institucioneve që ka kreu i mazhorancës. Rama i bën ndryshimet në interesin e tij dhe pastaj kërkon aleatë. Me zotin kryeministër dhe zotin Rama për arsye të qarta ideologjike ne nuk mund të futemi në koalicion.

Sokoll Balla: Nëse do të ishit kryeministër, cfarë do të bënit me zyrtarët që qeverisin sot?

Bamir Topi: Forcimi i shtetit dhe i institucioneve, në momentin që këto do të forcohen dhe do funksionojnë, do të bëhen reformat, institucionet dhe drejtësia do të marrë vendimet  e duhura. Ka nevojë që ky vend të futet në transparencë të plotë dhe është shumë e thjeshtë për ta bërë.

Sokol Balla: Jeni ndjerë i përgjuar?

Bamir Topi: Njeriu e ndjen veten komod kur e përgjojnë sepse ndjen se nuk është vetëm. Ne kemi të plota, dhe të jeni i sigurtë që për shkak të pozicionit që kam patur kam informacion edhe më shumë. Në takimin e zhvilluar në Durrës, fotografët e linjës inteligjente të partisë dhe qeverisë kanë fotografuar njerëz që janë marrë në analizë në struktura dhe pastaj janë marrë masat për t’i larguar nga puna. Sot po i referohem një aksioni politik që ka marrë opozita në parlament. Nëse opozita e nisi këtë aksion dhe e la në mes të rrugës i ka bërë një dëm të jashtëzakonshëm demokracisë në Shqipëri sepse nxorri fakte dhe nuk i shkoi deri në fund skandalit të përgjimit.

Sokol Balla: Në këto ditë apo javë ka ftesa ndërmjet partive, kryesisht ndaj partive të reja që mund të jenë një realitet elektoral. Ju nuk flisni për AK…

Bamir Topi: Unë respektoj profilin politik të atij formacioni dhe si i ri që është patjetër që interesat janë të ndryshme. Në sens parimor do ta inkurajoja dhe do t’i uroja sukses. Programet ndryshojnë në disa cështje që janë thelbësore në diferenca. AK për mua është një parti e qendrës sepse prevalojnë disa politika që kanë të bëjnë me elementë të patriotizmit që besoj nuk është i dëmshëm për secilin vend.

Sokol Balla: Një bashkëpunim me AK për momentin…

Bamir Topi: Nuk përjashtohet.

Sokol Balla: Aleanca është në të mirë të popullit apo të ideologjisë?

Bamir Topi: Kjo është arsyeja që ne në slogan nuk kemi momente ideologjike por me qytetarin. Janë vetë qytetarët që do të japin mbështetjen për një parti të caktuar.

Sokol Balla: Një pikë që ju dallon nga AK është se FRD nuk mori pjesë në këtë nacionalizmin kolektiv…

Bamir Topi: Së pari në profilin tim politik, por edhe të kolegëve të mi, është pikërisht ajo politikë që kam ndjekur në krye të institucionit të shtetit. Ne kemi parë integrimin e vendeve të rajonit në BE si një moment që do të bëjë të mundur jo vetëm lëvizjen e lirë të të gjithë njerëzve, do të heqë kufitjë, do t’i bëjë virtualë dhe do të heqë cdo kompleks që ka të bëjë me nacionalizmit. Përdorimi i kësaj retorike për qëllime elektorale nga ne është konsideruar e dëmshme.

Sokol Balla: Cfarë mendimi keni për memon amerikane?

Bami Topi: Ne jemi të ndërgjegjshëm që historia e Shqipërisë dhe e shqiptarëve ka qenë e lidhur pashmangshmërisht me rolin e partnerëve tanë strategjikë. Askënd të mos e gënjejë mendja nga udhehqësit shqiptarë që ka qenë përcaktues në fatin që kemi sot. Shqipëri në NATO, Kosovën e pavarur të pavarur, kemi një pozicionim të shqiptarëve në Maqedoni sipas marrëveshjes së Ohrit. Shqiptarët sot kanë një pozicion tjetër. Ne kemi bërë përpjekjet tona, por kur ka ardhur cështja për zgjidhje, ka qenë dora dhe kujdesi i SHBA.

Sokol Balla: Riker erdhi, më pas duke sikur Berisha ra në heshtje…

Bamir Topi: Ka heshtur sepse me sa duket është tërhequr. Nuk do dëshiroja t’i kushtoja më shumë kohë këtij personazhi që është mësuar që të krijojë tension dhe pastaj të tërhiqet me bisht ndërshalë.

Sokol Balla: Krizë PD-SHBA?

Bamir Topi: Është e dukshme. Krizë besimi me partnerët ndërkombëtar në përgjithësi. Ajo që po shikojmë në ftohjen e marrëdhënieve me Brukselin dhe Uashingtonin. Sot kemi parë edhe historinë e replikave për cështjen e 3 ligjeve, pra është e dukshme që ka një përplasje që nuk është më brenda zyrave.

Sokol Balla: Deklaruat se FRD do votonte 3 ligjet. Berisha ka hedhur idenë e referendumit për votimin e këtyre 3 ligjeve. Ka hasur në një kundërshtim të ndërkombëtarëve, mendimi juaj?

Bamir Topi: FRD e ka parimore atë që është deklaruar, që ne në cdo rast do të votonim cdo ligj që në radhë të parë i shërben demokracisë. Ne demokracinë në Shqipëri nuk e bëjmë për shkak të Fyles. Nëse shkon në referendum qendrimi ynë është që edhe nëse miratohen ato ligjet, demokracia në Shqipëri çalon në shume vende të tjera.

Sokol Balla: Edhe ligji i mbetjeve do të shkojë në referendum…

Bamir Topi: Cështja është që në një shtet që nuk funksionin si duhet…cështja e plehrave unë jam shprehur në mënyrë zyrtare e kam kthyer mbrapsht si president. Përsa kohë nuk kontrollohet se ca hyn, si hyn, etj. Unë jam kundër këtij ligji.

Sokol Balla: Jeni kritik ndaj Ramës, por keni një retorikë të ashpër ndaj Berishës dhe një fjalor të rëndë ndaj Ministrit të Brendshëm…

Bamir Topi : Është normale që të kesh këtë situatë të kriminalitetit. Të shkosh të bësh homazhe në një frekuencë kohore të lartë për komisarë policie cdo dy muaj dhe të premtosh që do marrim këto masa, ato masa dhe nuk marrin asnjë masë. 4-5 persona janë cimentuar në pozicione, ka nepotizëm dhe të lidhur direkt me kryeministrin.

Sokol Balla: Fotoja, policët dhe i dyshuari…

Bamir Topi: Për foton kam vlerësim kritik për cilindo që bën interpretime të tilla. Në karrierën time si politikan dhe si president nuk i kam mohuar askujt të bëjë foto. Përsa kohë njeriu është i lirë në atë moment nuk besoj që është një element që e inkriminon kur gjërat ndodhin mbrapa. Kjo është një cështje për t’u hetuar.

Sokol Balla: Keni lënë gjë pa thënë për 21 janarin?

Bamir Topi: 21 janari është një nga periudhat më të errta të demokracisë shqiptare. Vrasja e atyre qytetarëve dhe plagosja e shumë të tjerëve, mbetet një krim i shëmtuar që normalisht në dy vite mbrapa duhet jo vetëm të ishte zbardhur plotësisht në të gjitha këndvështrimet e ngjarjes së 21 janarit dhe drejtësia duhet të kishte vepruar. Por duke parë frymën që ekziston, frymën e nënshtrimit të institucioneve nga pushteti. Ajo ngjarje 2 vite mbrapa natyrisht na jep mundësinë që të analizojmë metamorfozën e qendrimeve të kryeministrit. Në fillim tha grusht shteti, komision hetimor, përcaktimet halucinacione cadër dhe pistoletë stilolaps. Njeriu më i ekspozuar për mënyrën e artikulimit të 21 janarit sot është kryeministri. Duke marrë në mënyrë kronologjike se si është shprehur më parë dhe si shprehet sot, natyrisht është përgjegjës për këtë. Unë besoj që jam shprehur në mënyrë të plotë. Kur është akuzuar presidenti që nuk është shprehur për 21 janarin unë kam kërkuar një insert ku presidenti u ka kërkuar palëve të ulin tensionet dhe të mos shkojnë drejt konfliktit.

Sokol Balla: FRD shkon drejt zgjedhjeve të 23 qershorit, vetëm por do të ftojë edhe parti të tjera. Përjashtoni koalicionin me PS për ideologji, dhe me PD për shkak të Berishës, koalicion paszgjedhor me PD por pa Berishën, por me PS…..

Bamir Topi: Sot unë nuk vij vetëm me një vendimmarrje personale. Probabliiteti më i mundshëm është që FRD do të futet në zgjedhje e vetme. Kemi përjashtuar koalicionet paraelektorale me dy partitë e vjetra dhe kemi dhënë arsyet tona. Përsa i përket cështjeve që kanë të bëjnë me situatën paszgjedhore është një vendimmarrje që nuk merret sot. Në interes të vendit mund të merren vendime që nuk janë në interes të partisë sonë, por për vendin. Përsa ne kemi informacion, ju siguroj që zgjedhjet e 23 qershorit,  pas tyre skena politike do të ndryshojë dukshëm pas zgjedhjeve dhe ky është një argument më shumë për të mos ditur se cfarë do të ndodhë pas zgjedhjeve. 

Top Channel