Pistorius, prokurorët: Vrau me paramendim
19/02/2013 00:00
Koreja e Veriut lëshon raketë të re balistike e dizajnuar të kërcënojnë SHBA-në 31/10 09:44
Atleti afrikano-jugor Oscar Pistorius qëlloi të dashurën e tij tre herë kur ajo ndodhej në tualet, në shtëpinë e tij.
Kështu kanë deklaruar prokurorët në seancën gjyqësore që po zhvillohet ndaj atletit të gjymtuar në qytetin e Pretorias, në Afrikën e Jugut. Pistorius është përlotur teksa dëgjonte prokurorët.
Avokati i tij mbrojtës ka deklaruar para trupit gjykues se vrasja nuk ishte e paramenduar. E dashura e tij, modelja Reeva Steenkamp u qëllua për vdekje të enjten e kaluar.
Seanca gjyqësore zhvillohet në të njëjtën ditë kur do të mbahet dhe funerali i modeles në Port Elizabeth.
Në raportimin e tyre mbi vrasjen, prokurorët kanë thënë se Pistorius ishte ngritur, kishte vënë protezat e tij, kishte ecur shtatë metra dhe kishte qëlluar me pistoletën e tij përmes derës së tualetit.
“Ai qëlloi katër herë, tre nga të cilat zunë Reeva Steenkamp. Më pas zoti Pistorius theu derën e tualetit dhe e mori trupin e viktimës në katin e poshtëm”, ka thënë prokurori Gerrie Nel.
Më herët prokurorët kanë thënë se do të ngrinin një akuzë për vrasje me paramendim kundër atletit 26-vjeçar, i njohur për pjesëmarrjen në Lorjat Olimpike dhe Paraolimpike të Londër 2012.
Nisur nga provat e grumbulluara nga hetuesit afrikano-jugorë në Pretoria rindërtuan pak ditë më parë skenën e mundshme të vrasjes së Reene Steenkamp nga kampioni.
Top Channel
