Sport

Goli më i pandershëm i vitit

19/02/2013 00:00

Kur mendojmë për golin më të pandershëm për vitin 2012, shumëkush me të drejtë mendon golin e shënuar nga Luis Adriano në takimin e Ligës së Kampioneve mes danezëve të Nordsjaeland dhe Shakhtarit të Doneskut.

Braziliani sulmues i skuadrës ukrainase përfiton nga apatia e mbrojtësve vendas duke rimarrë një top të diskutueshëm të rihedhur në lojë nga arbitri. Danezët menduan se topi do t’u rikthehej atyre, por jo Luis Adriano i cili nuk tregoi aspak mëshirë.

Megjithatë, goli që meriton “cmimin e pandershmërisë” mbërrin nga liga e dytë e kampionatit peruan, në sfidën mes Cesar Vallejo dhe Union Comercio. Vendasit sulmojnë nga krahu i djathtë me një krosim. Topi duket se përfundon pa problem në duart e portierit kundërshtar. Por ky i fundit, ndjen shqetësime si pasojë e një përplasje të mëhershme dhe rrëzohet në tokë.

Pas pak sekondash lëshon nga duart edhe topin. Një mbrojtës afrohet pranë sferës pa u ngutur dhe në përpjekje për ta larguar atë nga zona, topi përplaset në këmbët e një sulmuesi vendas dhe përfundon në rrjetë.

Gjithë lojtarët e Union Comercio drejtojnë shikimin e tyre nga gjyqtari i takimit, por ky i fundit e cilëson gol të rregullt, pavarësisht se portieri kërkoi ndihmën mjekësore.

Top Channel