Kryetari i Lëvizjes Socialiste për Integrim, Ilir Meta deklaron se vendimi për koalicionin e mundshëm zgjedhor për 23 Qershorin është një çështje që i takon forumeve të kësaj partie.
Meta tha se vendimi për koalicion do të merret në kohën e duhur prej forumeve drejtuese të LSI-së. Ai tha se forca që ai kryeson do të vijojë të jetë aktive në të gjitha debatet mbi qeverisjen, aktuale dhe për qeverisjen pas zgjedhjeve të qershorit.
Lidhur me procesin e integrimit, zoti Meta u bëri thirrje edhe njëherë tjetër forcave politike që të rrisin frymën e bashkëpunimit për të marrë statusin e vendit kandidat para zgjedhjeve parlamentare. Ai ftoi partitë që të votojnë ligjet dhe reformat e nevojshme për marrjen e këtij statusi.
Sa për vizitën e Komisionerit për Zgjerim, Stefan Fyle Meta tha se LSI e garantoi atë se është për një proces të lirë e të ndershëm si e vetmja mënyrë që kontribuon në forcimin e demokracisë dhe institucioneve të vendit tonë.
Top Channel
