Siri, mbi 80 të vdekur në Aleppo

Shpërthimet ndodhën në zonën midis konviktit të Universitetit të Aleppo-s dhe Fakultetit të Arkitekturës, në ditën e parë të provimeve.

Observatori Sirian për Të Drejtat e Njeriut njofton se kanë vdekur 83 persona, ndërsa drejtuesit lokalë të Aleppo-s kanë përmendur 82 të vdekur.

Televizioni shtetëror tha se “terroristët” lëshuan raketa mbi kampin, ndërsa aktivistët fajësuan lëshimin e raketave nga avionët luftarak.

Përgjatë dy viteve të luftimeve në Siri, Aleppo ka qenë skena e konfliktit më intensiv, midis qeverisë dhe forcave opozitare.

Gjithsesi, asnjë prej dy palëve të mësipërme nuk ka mundur të detyrojë palën tjetër të ulet në bisedime për zgjidhjen e konfliktit.

Shumë prej betejave janë përqendruar në zonat urbane, duke bërë që Aleppo të konsiderohet  si një “qytet fantazëm” prej shkatërrimeve, nga ana e korrespondentëve të mediave ndërkombëtare.

Gjatë javës së fundit, në të njëjtin qytet, kryengritësit realizuan një ofensivë, të cilës forcat e presidentit Bashar al-Assad iu përgjigjën me bombardime me artileri të rëndë dhe raketa të telekomanduara tokë-tokë.

Sipas Organizatës së Kombeve të Bashkuara, mbi 60 mijë sirianë kanë humbur jetën në luftën civile të nisur në mars 2011, ndërsa konflikti po bëhet gjithmonë e më i përgjakshëm për shkak të rritjes së kapaciteteve ushtarake nga ana e palëve ndërluftuese.

Top Channel