Nga Brazili mbërrin stërvitja e parë dhe konferenca e parë për shtyp e Alexandre Pato-s me fanelën e tij të re.
Ish-futbollisti i Milanit falenderoi kuqezinjtë për 5 vitet që ai i quajti të mrekullueshme të kaluara me fanelën e skuadrës italiane, por shtoi se tashmë duhet të shohë përpara e të japë kontributin e tij maksimal për skuadrën e tij të re.
Lidhur me gjendjen shëndetësore, braziliani tha se “kurrë nuk ishte ndjerë më mirë” dhe se mezi po priste që të zhvillonte ndeshjen e parë për skuadrën e Korinthiansit.
Pato u transferua në ditët e para të merkatos së janarit për shumën prej 15 milion eurosh nga Milani drejt vendlindjes së tij. Transferta i dha fund ulje-ngritjeve të tij me fanelën e kuqezinjve, paraqitje e kushtëzuar jashtë mase nga dëmtimet e shpeshta të tij.
Me Korinthians, që në dhjetor u shpall kampione bote pas fitores 1-0 në finalen e diskutuar me Chelsea-n, Pato do të luajë në ligën e parë braziliane dhe Kupën Libertadores, simotra e Ligës së Kampioneve në Amerikën Latine.
Top Channel
