Rusi Gerard Depardieu

Lajmi u njoftua nga zëdhënësi i kreut të Kremlinit. Pyetjes nëse në këtë takim Depardieu mori pasaportën personalisht nga dora e Putin, zëdhënësi iu përgjigj me jo, ndërkohë që në pamjet filmike të transmetuara nga televizionet ruse dëgjohet aktori francez teksa pyet presidentin rus nëse e kishte parë filmin e tij të fundit ku ai interpreton Rasputin.

Depardieu kushtëzon braktisjen e pasaportës franceze me ligjin e ri fiskal që rrit në 75 përqind taksat për të gjithë personat që përfitojnë më shumë se 1 milion euro në vit. Ishte vetë presidenti Vladimir Putin ai që i ofroi aktorit pasaportën ruse.

Vendimi i Depardieu ndezi polemika në Paris, polemika që vec ndarjes së publikut në pro dhe kundër, përfshiu edhe politikën, madje edhe vetë presidentin Francois Hollande.

Shumë media e cilësuan si “tradhëtar”, të tjera “e mirëkuptuan”, ndërsa vetë qeveria franceze, pavarësisht “kryqëzatës” së ndërmarrë kundër tij, tha se nuk do të tërhiqej nga rritja e taksave për të pasurit.

Top Channel