OKB rrit presionin ndaj Izraelit
20/12/2012 00:00
Sulm me dronë pranë kufirit me Venezuelën, gjashtë ushtarë të vrarë, dhjetëra të plagosur në Kolumbi 20/12 07:22
OKB po rrit presionin ndaj Izraelit për shkak të planeve të njoftuara prej tij për ndërtime në tokat palestineze, konkretisht në Bregun Perëndimor dhe në Jeruzalemin Lindor.
Sekretari i përgjithshëm Ban Ki Moon dhe anëtarët e Këshillit të Sigurimit, përveç Shteteve të Bashkuara, kërkuan që planet për ndërtimet të pezullohen menjëherë.
Kryeministri izraelit Benjamin Netanyahu deklaroi në ditët e fundit se qeveria e tij do të avancojë planet e kolonizimit.
SHBA mbrojnë Izraelin në OKB, por së fundmi Departamenti i Shtetit akuzoi shtetin hebre për veprime provokuese. Zëdhënësja Victoria Nuland deklaroi se aktiviteti i ndërtimit vë në rrezik planet për paqen.
Ditën e mërkurë, komiteti izraelit i planifikimeve dha miratimin e tij për ndërtimin e 2610 shtëpive në një zonë të re në Jeruzalemin Lindor, të quajtur Givat Hamatos, kolonia e parë që do të ndërtohet që prej 1997-ës.
Ndërkohë, janë shpallur edhe tenderat për ndërtime të shumta në Bregun Perëndimor, për një total prej 1 mijë shtëpish të reja.
Izraeli zaptoi Jeruzalemin Lindor në vitin 1967, gjatë luftës në Lindjen e Mesme, dhe e aneksoi atë si pjesë të kryeqytetit të tij, një lëvizje kjo që nuk është njohur kurrë nga ndërkombëtarët.
Palestinezët duan që zona të bëhet kryeqytet i shtetit që ata shpresojnë të instalojnë në Bregun Perëndimor dhe në Rripin e Gazës, edhe kjo tokë e zaptuar nga Izraeli.
Top Channel
