Schulz: Zgjedhjet, parakusht

Ai thotë se zgjedhjet luajnë një rol madhor, pasi janë elementi themelor që tregon se demokracia ekziston. Po ashtu, zoti Schulz thotë se rëndësia e medias së lirë është po aq e rëndësishme sa edhe zgjedhjet e lira.

TCH: Parlamenti Europian votoi më në fund një rezolutë për Shqipërinë. Çfarë duhet të bëjë vendi për të merituar statusin kandidat?

Schulz: “Duhet të vazhdojë, pasi mendoj se atmosfera ka ndryshuar në mënyrë shumë të mirë. Dialogu mes partive në vend është më i mirë. Dialogu mes institucioneve u përmirësua. Atmosfera, në përgjithësi, është më e mirë se në këto vitet e fundit. Ka ende probleme, por ndjesia ime është që ky tension i madh në vend të reduktohet në mënyrën më të mirë për të përfituar herët a vonë statusin kandidat”.

TCH: Testi i zgjedhjeve u përfshi në konkluzionet e Këshillit të Ministrave. E mbani mend intervistën tonë të fundit pak ditë para raport-progresit, po ju pyes sërish, sa të rëndësishme janë zgjedhjet e përgjithshme për marrjen e statusit kandidat?

Schulz: “Zgjedhjet e lira e të ndershme, në përputhje të plotë me standartet ndërkombëtare, në përputhje me standartet e Komisionit të Vencias, janë parakusht jo vetëm për Shqipërinë, por për çdo vend në mardhëniet me Bashkimin Europian. Nëse zgjedhjet janë të lira e të ndershme, atëherë vendi tregon se elementi themelor i demokracisë ekziston. Pra, zgjedhje të lira, të ndershme e të pavarura. Për këtë arsye mendoj se ato luajnë një rol madhor”.

TCH: Cili është qëndrimi juaj për presionet politike ndaj lirisë së medias?
 
Schulz: “Ju e dini se ka ende shumë për t’u bërë. Liria e medias nuk është ende e garantuar 100%. Ky është një apel, në kuadër të të gjitha raporteve të progresit, një thirrje për garantimin e lirisë së medias, sigurisë së gazetarëve dhe lirisë së shprehjes. Meqënëse është një element i rregullt në raportet e progresit, unë bëj thirrje se liria e medias është po aq e rëndësishme sa zgjedhjet e lira e të ndershme”.

Interevistoi: Arta Tozaj

Top Channel