Për këdo që ndodhet në një avion në fluturim, fraza “a ka ndonjë pilot në bord” duhet të jetë më e frikshmja që mund të dëgjojnë.
Ishte pikërisht, kjo ajo që ndodhi gjatë fluturimit të një “Boeing 747” të “Lufthansa”-s, nisur të martën nga Frankfurti për në Dublin, Irlandë.
Në fluturim, piloti i dytë në kabinë u paaftësua për shkak të një migrene të fortë, duke u larguar nga vendi i pilotimit për shkak të dhembjes.
Një avion mund të drejtohet pa problem edhe nga një pilot i vetëm, por kapiteni vendosi që të pyeste gjithsesi nëse kishte një tjetër pilot në bord, për të garantuar një siguri sa më të lartë për udhëtarët e tij.
FOTO: Boeing 747 i “Lufthansa”-s, i njejte me ate te ulur ne Dublin fale ndihmes se udhetarit-pilot
I ndodhur në udhëtim, një pilot jashtë detyre pranoi që t’i bashkohej kapitenit dhe ta ndihmonte në përfundimin e udhëtimit, me avionin që u ul pa probleme dhe në orar në mëngjesin e së martës.
Ndërkohë, nëpërmjet një zëdhënësi, “Lufthansa” deklaroi: “Sa herë që verifikohet një situatë e pazakontë mjekësore në bord, prania e një doktori apo një personi tjetër të kualifikuar në mënyrë të përshtatshme është e vlerësuar. Fluturimi do të kishte vazhduar i sigurt dhe pa probleme edhe nën drejtimin e vetëm të kapitenit, por prezenca e një piloti jashtë detyre në avion i solli fluturimit një element sigurie shtesë, për të cilat kompania jonë është gjithmonë e kujdesshme”.
Top Channel
