Greqia, Eurogrupi pranë marrëveshjes

Sipas mediave ndërkombëtare, paratë do të derdhen në bankat greke më 5 dhjetor, me kusht që Athina të jetë në rregull me të gjitha kushtet e kërkuara.

Dega e agjencisë “Reuters” në Berlin citon burime të afërta me mbledhjen e Eurogrupit ditën e nesërme që thonë se, pritet një mbështetje politike në parim për zhbllokimin e ndihmave.

Javën e kaluar qeveria greke arriti të siguronte fonde të cilat shmangin falimentimin e menjëhershëm në rast të zgjatjes së bisedimeve për kredinë e radhës nga trojka, nëpërmjet shitjes së bonove të thesarit me afat të shkurtër maturimi.

Athina zyrtare siguroi të martën 4,06 miliardë euro nga shitja e bonove me afat 1-mujor maturimi, me interes 3,95% dhe nga bonot 3-mujore, me interes 4,2%.

Këto para do të shërbejnë për të përballuar këstin e pagimit të një kredie të mëparshme prej pesë miliardë eurosh, që duhet të paguhet brenda ditës së premte.

Më parë, kryeministri Samaras kishte thënë se pa marrjen e këstit të radhës nga trojka, financat helene do të shterronin deri në datën 15 nëntor.

Për Greqinë, kjo ishte mënyra e vetme për të siguruar fonde të menjëhershme, pasi Fondi Monetar Ndërkombëtar, Banka Qendrore Europiane dhe Bashkimi Europian ende nuk kanë vendosur për huanë e radhës, për të cilën fqinji ynë jugor ka nevojë të domosdoshme.

Top Channel