“Më shumë kohë mund të jepet për të reduktuar borxhin grek”. Kështu ka deklaruar ministri gjerman i Financave, Wolfgang Schaeuble lidhur me zgjatjen e afateve, që përveç reduktimit të defiçitit do të shërbente edhe për borxhin grek.
“Objektivi për ta çuar borxhin në kuotën 120 për qind të GDP-së në vitin 2020 është paksa ambicioz”, ka thënë Schaeuble gjatë një vizite në Paris.
“Mendojmë se një marrëveshje për Greqinë është e nevojshme dhe mund ta arrijmë të martën e ardhshme”, ka thënë nga ana tjetër ministri francez i Financave, Pierre Moscovici.
Dy ministrat e Financave, në konferencën e përbashkët për shtyp, kanë shprehur pikëpamje të përbashkëta përsa i përket krizës financiare greke.
Ndërkohë, në Greqi vazhdojnë grevat dhe protestat. ADEDY, një nga dy sindikatat më të mëdha të Greqisë ku përfshihen punonjësit shtetërorë, ka organizuar për sot ndërprerjen e punës nga ora 12:00 deri në përfundim të turnit ditor.
Veprimi në fjalë bëhet në shenjë proteste ndaj paketës së masave anti-krizë të miratuar nga Parlamenti të mërkurën e kaluar dhe që parashikojnë mes të tjerash nxjerrjen në asistencë të 2 mijë funksionarëve publikë.
Ndërkohë, për nesër, më 14 nëntor, në kuadër të ditës paneuropiane të protestës kundër politikave anti-krizë, ADEDY bashkë me sindikatën tjetër GSEE, që përfaqëson sektorin privat, kanë organizuar po ashtu ndërprerjen e punës në të njëjtin orar, si dhe një manifestim në sheshin Klathmonos, në qendër të Athinës.
Top Channel
