Kleriku mysliman Abu Qatada do të lirohet me kusht të martën, pasi ka fituar apelin në Komisionin e Posaçëm të Emigracionit.
Apeli i tij kundër dëbimit u mbajt pasi avokatët deklaruan se nuk do të kishte një gjyq të ndershëm në Jordani, ku akuzohet për planifikim atentatesh terroriste.
Gjithësesi, Abu Qatada do të jetë subjekt i kushteve të rrepta mbikëqyrëse, mes të cilave një shtetrrethim që do të hyjë në fuqi menjëherë pasi ai të lërë burgun Long Lartin në Uorçestershajër.
Sipas BBC, sekretarja britanike e Brendshme, Theresa May e ka cilësuar vendimin si “shumë të pakënaqshëm”. May u tha ligjvënësve se qeveria ka bërë gjithçka që kishte në dorë që të dëbonte Abu Qatada dhe se do të vazhdojë ta bëjë këtë.
“Qatada është një person i rrezikshëm, i dyshuar për terrorizëm dhe që akuzohet për krime të rënda në vendin e tij të lindjes, Jordani”, tha May.
Sipas saj, qeveria britanike ka siguruar nga qeveria jordaneze garanci, jo vetëm në lidhje me trajtimin e Qatada, por edhe për cilësinë e proçesit gjyqësor ndaj tij. “Për këtë arsye, ne do të kërkojmë shfuqizimin e apelit të sotëm”, shtoi May.
Ajo nënvizoi se qeveria do të vazhdojë të ndjekë të gjitha rrugët me homologët jordanezë, të cilët sipas saj kanë premtuar se asnjë provë e siguruar përmes torturës do të përdoret kundër predikuesit.
Abu Qatada, emri i vërtetë i të cilit është Omar Othman, do të jetë subjekt i disa kushteve që parashikojnë: lejimin e daljes nga shtëpia mes orës 08:00 dhe 16:00, mbajtjen e një byzylyku elektronik për sinjalizimin e vendndodhjes dhe kufizimin e personave që mund ta vizitojnë.
Top Channel
