Besa-Skëndërbeu, barazim por jo paqe

Nuk kanë munguar loja e fortë, polemikat, kartonat, dëmtimet, 11-metërshat dhe golat, pra gjithçka brenda këtij 90 minutëshi që i ndau nga një pikë vendit të parë dhe të dytë të Superligës.

Pas një 11-metërshi të humbur të Pejiçit ishte Mihani që zhbllokoi takimin pas një goditjeje standarte të devijuar që nxorri jashtë loje portierin Shehi.

U duk se lojën do ta mbanin vendasit të cilët me mbështetjen e tifozerisë dhe me euforinë e krijuar mund t’ia dilnin, por shumë shpejt Berisha, një nga lojtarët kryesorë të kavajasve, la skuadrën me dhjetë lojtarë.

Në këtë 90 minutësh ai u bë protagonist vetëm për këtë gjë dhe hedhjet teatrore në disa raste. Vetëm 60 sekonda dhe Skëndërbeu gjeti golin e barazimit me Plakun, i cili përfitoi nga dalja e gabuar e portierit.

Ndërkohë, në Vlorë arrin të fitojë, madje bindshëm, FLamuartari 3-0 me Kastriotin. Veliu, Muzaka dhe Memelli ishin autorët e tre golave. Një fitore kjo me shumë vlera morale për skuadrën e Rubios, e cila me sa duket më në fund ka nisur të funksionojë si duhet.

Në ndeshjet e tjera Laçi mundi 3-0 Luftëtarin, i cili pësoi këtë humbje të parë nën drejtimin e Edi Martinit, ndërkohë që Ramadan Shehu regjistroi fitoren e parë si trajner i laçianëve. Ndeshja tjetër mes Shkumbinit dhe Apollonisë përfundoi në barazim 0-0.

Top Channel