16 futbollistë të përjashtuar me karton të kuq, nga tetë për çdo skuadër. Ky ishte rezultati i një zënke masive në një ndeshje futbolli në Uruguaj, e cila duket e destinuar për t’u futur në librin e rekordeve “Guiness”.
Pas përfundimit të ndeshjes së kampionatit në barazimin 3-3, një prej futbollistëve të Juventud provokoi një sherr masiv, i cili përfshiu pothuajse të gjithë futbollistët në fushë.
Si rrjedhojë e shkëmbimit të grushtave dhe shqelmave të ndërsjellta, disa futbollistë u shoqëruan në spital, ndërsa gjyqtari ndërhyri në fushë duke shfaqur kartonin e kuq në raste “të pafundme”.
Në përfundim të ndeshjes, klubi i Juventud informoi për përjashtimin e futbollistit Cristian Latorre, pasi ishte ai nismëtari i zënkës.
Ndërkohë, Federata Uraguajane e Futbollit informoi se është duke analizuar të gjithë sekuencën e ngjarjeve dhe pritet të marrë masa të ashpra ndaj futbollistëve të përfshirë.
Pavarësisht masave të ashpra, dhuna në futbollin uruguajan është një ndodhi e shpeshtë. Në një ndeshje të zhvilluar në muajin maj, 17 futbollistë të ekipeve Cerro dhe Cerro Largo u dënuan me pesë ndeshje pezullim, pas një zënke masive në një ndeshje kampionati.
Top Channel
