Kosovë, vendosen bustet e patriotëve

Zoti Berisha mbërriti në Gjakovë të premten paradite, ku pavarësisht shiut që binte, shumë qytetarë kishin dalë për ta pritur. Pas 10 minuta shëtitje në këmbë nëpër qytetin e Gjakovës, Presidentja e Kosovës, Atifete Jahjaga dhe Kryeministri i Shqipërisë Sali Berisha kanë zbuluar bustin e Ali Ibër Nezaj, patriot i njohur që nga koha e Lidhjes Shqiptare të Prizrenit.

Nga Gjakova, Berisha ka vizituar varrezat e dëshmorëve në fshatin Gllogjan të Deçanit, dhe është ndalur më pas në Kuvendin e kësaj komune.
                
Pas Deçanit, Berisha i shoqëruar nga Presidentja e Kosovës, Atifete Jahjaga dhe kryeministri Hashim Thaçi kanë marrë pjesë në manifestimin e organizuar në Isniq, në fshatin e prejardhjes të heroit të kombit, Isa Boletini.

“Apeli i këtyre burrave është frymëzues dhe i fuqishëm ndaj dhe sdo ndalemi para tyre që të punojmë cdo ditë, cdo javë, cdo muaj për bashkimin tonë përfundimtar në Europën e bashkuar për prosperitetin dhe të ardhmen tonë të ndritur”, tha Sali Berisha, Kryeministër i Shqipërisë.

Me zbulimin e shtatores së heroit Isa Boletini, është përmbyllur edhe vizita e kryeministrit Berisha, e cila është e treta më radhë vetëm brenda këtij viti.

Prania e krerëve më të lartë të shtetit kosovar dhe kryeministrit shqiptar në rajonin e Dukagjinit është shoqëruar me masa të larta sigurie. Vihej re një prezencë e madhe e forcave policore të Kosovës, ndërkohë që sipas zëdhënësit të policisë Baki Kelani, përgjegjësinë për sigurinë dhe përcjelljen e delegacionit nga Tirana e ka pasur Policia e Kosovës, mirëpo me të janë edhe disa përcjellës të sigurimit të tij, të cilëve u është miratuar hyrja në bazë të procedurave ligjore që kërkohen paraprakisht.

I pyetur nëse bëhej fjalë pikërisht për pjesëtarë të Gardës së Republikës së Shqipërisë, zëdhënësi Kelani nuk pranoi të japë asnjë shpjegim.

Top Channel