Irlanda është në prag të sigurimit të të ardhurave të papritura, që pritet të sigurojnë miliarda euro shtesë për financat në vështirësi të Dublinit zyrtar.
Lajmi i mirëpritur për kombin me 4,6 milionë banorë u dha prej kompanisë “Providence Resources Plc”, e cila pas disa testimeve, konfirmoi ekzistencën e një rezerve të madhe nafte pranë brigjeve irlandeze.
Zona e ndodhur 30 milje nga qytetit i Korkut besohet se ka një rezervë totale prej 280 milionë fuçish nafte.
Paratë që do të fitojë shteti do të varen nga kostot e ndërtimit të platformave, ato të licensimit të kompanive private dhe nga çmimi në bursat ndërkombëtare në momentin e shitjes së produktit, por pritet që të ardhurat shtesë të japin një ndihmë të madhe në rigjenerimin e financave irlandeze, vendit që kërkoi një hua madhore prej 75 miliardë eurosh nga BE në vitin 2011, për të mbushur boshllëkun e krijuar në defiçitin shtetëror.
“Pas disa dekadash kërkimesh në brigjet irlandeze, më në fund kemi arritur të shkruajmë këtë histori suksesi. Ky është një lajm i madh për kompanitë irlandeze të naftës dhe mbi të gjitha për të gjithë kombin tonë”, deklaroi Tony O’Really, shefi ekzekutiv i kompanisë “Providence”, ajo që udhëhoqi studimin e bregdetit.
Top Channel
