VV: 76 mijë të papunë nga privatizimet

28/09/2012 15:40

Proçesi i privatizimit në Kosovë deri më tani ka lënë pa punë mbi 76 mijë punonjës. Këto shifra shqetësuese u bënë publike nga lëvizja Vetëvendosje.

Aktivistë të lëvizjes në sheshin e kryeqytetit në mënyrë simbolike shënuan 76 mijë vija për të lënë gjurmë për pasojat që ka sjellë privatizimi në Kosovë.

“Humbja e këtyre vendeve të punës ka rrezikuar mirëqenien e rreth 12.667 familjeve në Kosovë. Privatizimi ka rezultuar në shkatërrimin e vendeve të punës, që i ka ulur të ardhurat për familje dhe si pasojë ka rrezikuar shkollimin e fëmijëve dhe kujdesin shëndetësor në këto familje. Për më tepër, privatizimi ka shkatërruar industrinë duke ia ndërruar destinimin shumicës së ndërmarrjeve prodhuese duke i shndërruar nga ndërmarrje prodhuese në hotele për ahengje, nga toka bujqësore në ndërtime betoni”, deklaroi Dardan Molliqaj, sekretari organizativ i Vetëvendosjes.

Aktivistët e VV-së thonë se, ky model i privatizimit ka rrezikuar edhe potencialin për zhvillim ekonomik, duke e kthyer Kosovën në një vend që vetëm konsumon.

Ndërkohë që, procesi i privatizimit është faktori kryesor që Kosova renditet e para në Evropë për nga varfëria dhe papunësia.

Sipas VV-së privatizimi i PTK-së, KEK-ut dhe Trepçë duhet parandaluar në mënyrë të evitohet një katastrofë ekonomike, në mënyrë që në të ardhëmn  brezit të ri mos t’i trashëgojmë veç varfërinë.

Top Channel