Krimet monstruoze të ushtarëve gjermanë

22/09/2012 11:20

Ushtarët e rangjeve të ulta të ushtrisë gjermanë gjatë Luftës së Dytë Botërorë nuk konsiderohen fajtorë për krimet e tmerrshme ndaj civilëve dhe ato deri më sot iu janë faturuar gradave të larta të ushtrisë dhe trupave SS.

Por publikimi i regjistrimeve të shërbimit sekret britanik tregojnë se si “argëtoheshin” ushtarët gjermanë duke vrarë, civilë, gra dhe fëmijë.

13 mijë ushtarë gjermanë dhe qindra oficerë të lartë italianë u burgosën në Londër në përfundim të luftës më të përgjakshme të njerëzimit. Në kamp u vendosën mikrofonë përgjimi nga inteligjenca britanike në përpjekje për të zbardhur sa më shumë mistere të luftës.

Materialet e përftuara ishin shokuese. Në bisedat mes tyre, të publikuara në një libër të dy historianëve gjermanë, Soenke Neitzel dhe Harald Welzer ushtarët e thjeshtë tregonin me “pasion” e nostalgji krimet e kryera dhe emocionet gjatë ekzekutimit të civilëve.

Ja njëra nga bisedat e sjella në libër mes tre ushtarëve gjermanë, Weber, Heuser dhe Zotloterer:

Zotloterer: Qëllova një francez nga pas. Ishte me biçikletë
Weber: Nga afër?
Zotloterer: Po!
Heuser: Kërkoi të të merrte peng?
Zotloterer: Jo jo! Doja biçikletën e tij.

Si ky rrëfim i sinqertë ka me qindra të tjerë dhe disa prej të cilëve edhe më të tmerrshëm, që përshkruajnë vrasje, gjymtime, rrëmbime dhe përdhunime.