Mustafa: Konsensus për bisedimet

Kështu ka deklaruar kryetari i LDK-së, Isa Mustafa, i cili kundërshton zhvillimin e dialogut politik ndërmjet Kosovës dhe Serbisë.

Këtë deklaratë Mustafa e ka bërë në Londër gjatë një takimi që ka zhvilluar të mërkurën me drejtorin për Ballkanin në Ministrinë e Punëve të Mbretërisë së Bashkuar, Owen Jenkins, si dhe me David Lider, udhëheqës për Kosovën.

I pyetur nëse do të thotë se LDK ka ndryshuar pozicionin dhe pranon që të flasë për veriun, shefi i grupit parlamentar të LDK-së dhe sekretari i përgjithshëm i kësaj partie, Ismet Beqiri, ka sqaruar për Top Channel se kjo nuk është e vërtetë.

“Qëndrimi i LDK-së mbetet i njëjtë sa i përket bisedimeve. Nuk është çështje urgjente që duhet të bisedohet, e aq më tepër nuk pranojmë të bisedojmë për sovranitetin dhe rregullimin e brendshëm, prandaj kjo është çështje e një vendi dhe jo e një qeverie”, ka deklaruar Beqiri.

Sipas Beqirit, “kjo nuk do të thotë se LDK është për biseda për veriun me Serbinë, por mbështet vetëm dialogun me qytetarët e asaj pjese që duhet ta zhvillojnë institucionet e Kosovës”.

Ai shtoi se Lidhja Demokratike e Kosovës nuk jep një konsesus të tillë, ku mund të vihet në pikëpyetje sovraniteti dhe rendi i brendshëm.

Top Channel