Stafi i huaj i Save the Children është urdhëruar të lërë Pakistanin brenda dy javësh, ka njoftuar vetë agjencia.
Ajo thotë se nuk i është dhënë asnjë sqarim për këtë urdhër, por korrespondentët thonë se kjo lëvizje e Islamabadit zyrtar është një përgjigje ndaj operacionit për vrasjen e Bin Laden.
Pas operacionit të vitit të kaluar në Abotabad, që çoi në eleminimin fizik të sheikut të terrorit, një doktor pakistanez u arrestua për bashkëpunim me CIA-n.
Zyrtarët e shërbimeve sekrete pakistaneze akuzojnë Save the Children për përfshirje në këtë operacion, akuza këto që hidhen poshtë nga grupi.
Gjashtë nga anëtarët e stafit të tij në Pakistan janë të huaj. Grupi bamirës ka punuar në Pakistan për më shumë se 30 vjet.
Korrespondentët deklarojnë se përjashtimi i të huajve nuk do të ketë ndonjë impakt domethënës në operacionet afatshkurtra të grupit në këtë vend.
Doktori Shakil Afridi u arrestua pasi u zbulua se kishte drejtuar një program të rremë vaksinimi me kërkesë të CIA-s, si pjesë e përpjekjeve të saj për të lokalizuar Bin Laden.
Doktori u dënua me 33 muaj burg në maj, në një proçes kontrovers të mbajtur me dyer të mbyllura, sipas sistemit gjyqësor tribal pakistanez.
Fillimisht mendohej se ai ishte burgosur për programin e vaksinimit, por dokumentat e gjykatës treguan më vonë se ai ishte dënuar për lidhje të dyshimta me një grup militant.
Top Channel