Urithi misterioz i Pirenejve

Kafsha e rrallë është në listën e gjitarëve në zhdukje dhe shkencëtarët po përpiqen ta njohin më mirë atë në mënyrë që të ndihmojnë në shpëtimin e saj.

Por pak njerëz kanë patur fatin të shohin llojin  e rrallë të këtij urithi për shkak se ai del vetëm natën dhe ka për habitat vetëm zonat e Pirenejve në Portugali, Spanjë dhe një pjesë të Francës.

Yolanda Melero, udhëheqësja e ekspeditës shkencore thotë se dikur ky urith ishte i përhapur gjërësisht në gjithë malësitë e Pirenejve, por me kalimin e kohës është zhdukur dhe ata pak që i kanë mbijetuar zhdukjes janë strehuar në Parkun Natyral të Barcelonës.

“Është një krijesë speciale dhe një notar i shkëlqyer. Ne do të mundohemi të kuptojmë më mirë përhapjen e tyre, edhe pse ky është një mision i vështirë për faktin se këtë lloj urithi nuk mund ta takosh ditën, por vetëm natën kur edhe del për t’u ushqyer. Kemi disa të dhëna të grumbulluara nga vitet 1980-1990, por ato nuk janë të besueshme”, thotë Melero.

Shkencëtarët thonë se një tjetër arsye se pse po ngulmojnë të mësojnë më shumë rreth këtyre krijesave është se ato mund të na bëjnë të kuptojmë më shumë rreth gjallesave që kanë populluar tokën miliona vite më parë, duke qenë se janë lloji i fundit në linjën e evolucionit të species.

“Mund t’u studiojmë ADN- në e të kuptojmë më shumë mbi përbërjen e tyre gjenetike, që nuk është studiuar shumë mirë deri më tani”, thotë Jose Castresana nga Instituti i Biologjisë së Evolucionit në Barcelonë, njëkohësisht pjesë e ekspeditës kërkimore të Galemys pyrenaicus.

Ky lloj urithi njihet si ndër banorët më të hershëm dhe më të rrallë të Europës.

Top Channel