Arrihet marrëveshja në Greqi

Deklarata e tij u bë menjëherë pas mbledhjes tepër të tensionuar të tre liderëve të partive të koalicionit qeverisës,  ku socialistët dhe e Majta Demokratike nuk kanë rënë dakord me masat për reduktimin e mëtejshme të rrogave dhe pensioneve, por së fundmi kanë pranuar programin e përcaktuar nga kryeministri dhe ministri i Financave, duke shmangur kështu rrëzimin e qeverisë.

“Nëse nuk marrim tani këto masa, në shtator nuk do të mund të paguajmë askënd”, ka deklaruar Samaras duke shtuar se preferon qëndrimin e vendit në eurozonë dhe jo destabilitetin politiko-ekonomik të vendit.

Nga ana e tij edhe kryesocialisti Venizelos që ka kritikuar paketën e masave prej 11.5 miliard euro, prej të cilave më shumë se gjysma do të përfitohen nga shkurtimi i rrogave dhe pensioneve, ka deklaruar se për hir të së ardhmes së vendit brenda zonës së monedhës së përbashkët, ishte i detyruar të pranonte programin e kryeministrit me të gjitha pasojat negative që mund të ketë.

“Ne nuk do të sillemi ashtu si konservatorët në nëntorin e vitit 2011, duke e cuar vendin në zgjedhje të parakohëshme”, ka thënë ai duke treguar edhe njëherë se klima në qeverinë e koalicionit tre partiak është tepër e tensionuar dhe nuk ngjall aspak optimizëm për të ardhmen.

Qeveria greke shpreson se pasi të paraqesë paketën me masat e rrepta përfaqësuesve të BE,BQE dhe FMN, do të ketë mundësi të kërkojë një shtyrje afati prej dy vitesh për shlyerjen e borxheve.

Përvec reduktimit të katërt të radhës, të të ardhurave të nënpunësve të administratës civile dhe të pensioneve të tyre, në paketën e masave përfshihen edhe privatizimet e shumta të organizmave dhe kompanive shtetërore prej të cilave disa, tepër fitimprurëse.

Top Channel