Ukrainë, shtyhet gjyqi i dytë ndaj Tymoshenko-s

Ambasadorë dhe të dërguar të lartë të BE-së ishin të pranishëm në sallën e gjyqit ditën e hënë, teksa u vendos që nisja e procesit për evazion fiskal të shtyhet.

Bashkimi Europian ka akuzuar Kievin zyrtar për montimin e një procesi politik, ndaj udhëheqëses së parë femër të vendit, aktualisht e burgosur me shtatë vjet heqje lirie, pasi u gjet fajtore për abuzim me detyrën, gjatë vitit 2011.

Në shenjë proteste ndaj burgimit të saj, liderat e vendeve europiane kanë bojkotuar në mënyrë të përbashkët ndeshjet e Europianit në Ukrainë dhe do të mungojnë edhe në finalen e 1 korrikut.

Gjykata e Kharkivit, ku Tymoshenko po ndiqet, justifikoi vonimin e procesit me dhënien e kohës për ekzaminimin mjekësor të lideres që ka vuajtur nga disa probleme serioze, që prej fillimit të burgosjes së saj.

Më parë gjatë prillit, ajo akuzoi gardianët e burgut ku mbahet se e kishin keqtrajtuar fizikisht, ndërsa publikoi disa fotografi ku shfaqeshin shenja të dukshme abuzimi, duke krijuar një valë të re kritikash ndaj presidentit Janukovych.

Jashtë ndërtesës së gjykatës, turma prej mijëra njerëzish në mbështetje dhe kundër Tymoshenkos mbajtën njëkohësisht manifestime.

Nëse do të shpallet fajtore, dënimi i Tymoshenkos 51-vjeçare mund të zgjatet nga shtatë vjet, deri në 18 vite heqje lirie.

Top Channel