Kriza e euros, miliona njerëz të rrezikuar nga uria

Sipas të dhënave, BE ka reduktuar ndihmat për vendet në nevojë në nivelin më të ulët prej një dekade.

Mungesa e rritjes ekonomike në pothuajse të gjithë vendet e zhvilluara të BE-së dhe “thithja” e fondeve nga vendet në krizë si Spanja dhe Greqia kanë kontribuar për të krijuar këtë gjendje të rëndë.

Vetë këto dy vende, dikur kontribuese bujare për vendet e botës së tretë, aktualisht kanë ndërprerë pothuajse çdo lloj investimi humanitar.

”Pasojat më të rënda të krizës europiane nuk po i ndiejnë banorët e shteteve të Eurozonës, por ata të vendeve më të varfëra në botë”, shkruhej në raport.

”Ndërsa BE shtrëngon buxhetet dhe është e prirur drejt kursimit, ndihma për më të varfërit e planetit, së bashku me programet që i mbajnë gjallë me miliona banorë çdo ditë është rrudhur në mënyrë të frikshme”.

Aktualisht, kontribuesit më të mëdhenj humanitarë brenda BE-së janë Gjermania, Britania dhe Franca, me 12-14 miliardë euro ndihma secili, por kjo ndihmë, në secilin prej vendeve nuk kalon më shumë se 0,4% të Prodhimit të Brendshëm Bruto.

”Në vende si Mozambiku, Tanzania dhe Malaui, me miliona persona janë të rrezikuar nga uria dhe sëmundjet, si pasojë e shkurtimit të ndihmave dhe e njëjta situatë është edhe në dhjetëra vende të tjera të varfëra. Ndjeshmëria e ulët ndaj vendeve në nevojë mund t’u kushtojë jetën miliona njerëzve”, përfundonte raporti i “Data”-s.

Top Channel