Avioni turk i rrëzuar të shtunën u qëllua jashtë hapësirës territoriale të Sirisë, lajmëroi ministri i Jashtëm Turk, Ahmed Davotuglu.
Megjithatë, Davutoglu pranoi se gjuajtësi “F-16”, i cili udhëtonte i paarmatosur, hyri shkurtimisht në Siri gjatë rrugëtimit të tij, pas nisjes nga një bazë në jugun e Turqisë.
Pavarësisht deklaratës, Damasku vazhdon të mbetet tek qëndrimi zyrtar, se “avioni u rrëzua në përputhje me ligjet ndërkombëtare, brenda hapësirës territoriale të Sirisë, e cila u shkel pa asnjë autorizim”.
Deklarata e Davutoglu erdhi pasi funksionarët më të lartë turq u takuan të dielën në një mbledhje të nivelit të lartë, ndërsa kërkimet në det për gjetjen e pilotëve të një avioni të rrëzuar nga antiajrorët sirianë vazhdojnë edhe gjatë së dielës.
Davutoglu konfirmoi gjithashtu se ka pasur biseda telefonike edhe me Sekretarin e Përgjithshëm të OKB-së, Ban Ki-moon, kryediplomaten europiane Catherine Ashton dhe ministrat e jashtëm të Shteteve të Bashkuara të Amerikës, Rusisë, Britanisë së Madhe, Francës dhe Iranit në lidhje me incidentin.
Ditën e shtunë, një avion “F-16” me dy pilotë në bord u qëllua nga sistemet mbrojtëse siriane, pasi shkeli hapësirën ajrore të vendit.
Sipas ekspertëve, përgjigja e Ankarasë ka qenë çuditërisht pajtuese. Një sjellje e tillë tregon se Turqia është e vendosur të mos përfshihet në një konflikt të armatosur me fqinjin e saj jugor, pavarësisht kritikave ndaj regjimit të Bashar al-Assad.
Njëkohësisht, rrëzimi i avionit të prodhimit amerikan tregon se Siria është e pajisur me sisteme të sofistikuara ruse anti-ajrore.
Top Channel
