Prishtinë, përurohet zona turistike

Zona turistike në fshatin Keqekollë do të ofrojë për turistët shtëpi mikpritëse, ushqim tradicional, kalërim si dhe oferta të tjera tradicionale e turistike.

Sipas menaxherëve të projektit, fillimisht do të trajnohen 15 familje të cilat do të përkrahen me grante për përgatitjen e ushqimeve tradicionale dhe turizmit rural.

Gjithashtu, do të trajnohen tetë ciceronë si dhe tetë gra të vjetra për përgatitje dhe shitjen e prodhimeve vendore e tradicionale, njofton agjencia “Kosova Press”.

Kryetari i komunës së Prishtinës, Isa Mustafa deklaroi gjatë ceremonisë se ky projekt është i vlefshëm pasi do të ndalë shpërnguljen e banorëve të kësaj ane, si dhe do të kontribuojë në hapjen e vendeve të reja të punës.

Shefi i operacioneve në Zyrën e BE-së, Christof Stock tha se ky projekt jo vetëm promovon turizmin, por mbështet zhvillimin ekonomik në rajonin e Prishtinës.

Për realizimin e këtij projekti, Zyra e BE-së në Prishtinë ka dhënë rreth 240 mijë euro, ndërsa Komuna e Prishtinës 20 mijë euro. Sipas menaxherëve, projekti parashikohet të përfundojë në maj të vitit 2013.

Top Channel