Tiranë, muzika e lartë në bare

Nëse deri pak javë më parë disi problematike kanë qenë lokalet e mbyllura, por pa izolim të mirëfilltë akustik, tani me ngrohjen e motit kanë nisur punë lokalet e quajtura verore, të cilat në ambiente të hapura po shkaktojnë shqetësime dhe probleme të mëdha për të gjithë ata banorë që në një zonë si blloku me dendësi të madhe e kanë të vështirë të pushojnë edhe natën.

Zhurmat e muzikës vazhdojnë deri në orët e para të mëngjesit, ndërsa qytetarët ndjehen sërish të pafuqishëm për t’u përballur me problemin pasi edhe kontrolli i strukturave shtetërore, policisë së rendit dhe asaj bashkiake ndaj këtyre diskobareve të hapur duket se këtë fillim-sezoni po mungon.
Top Channel ka mësuar se asnjë nga këto disko-bare nuk zotëron leje mjedisore për ushtrim aktiviteti pas orës 24:00, ndërsa pronarët e tyre nuk duken të shqetësuar për problemet që u shkaktojnë banorëve me volumin e muzikës në maksimun, jo vetëm në mbrëmje, por deri në mengjes kur largohet edhe klienti i fundit.

Këto bare kanë detyrim ligjor që të respektojnë orën 24:00, detyrim që përgjithësisht është respektuar verën e kaluar. Në atë orë baret ishin të detyruar të ulnin volumin e muzikës apo të mbyllnin aktivitetin, por këtë fillim sezoni veror, ata jo vetëm që nuk e respektojnë orarin e paravendosur, por janë kthyer sërish në makth për qytetarët.

Top Channel