Policia kineze bastis Tibetin
31/05/2012 10:10
Përplaset avioni në aeroportin e Karolinës së Veriut, 6 persona humbin jetën, autoritetet: Shpërtheu në flakë 18/12 22:00
Forcat kineze të sigurisë kanë kryer një seri bastisjesh në Lasa të Tibetit, ku dhe kanë arrestuar të paktën 600 persona pas dy rasteve të vetëvënies së zjarrit ditën e diel.
Dëshmitarë të dy akteve të zjarrvënies janë arrestuar, ndërsa tibetianë nga jashtë Lasës janë dërguar në shtëpi, raportojnë mediat ndërkombëtare.
Dy burra tibetianë i vunë flakën vetes jashtë tempullit Jokang, një veprim ky që dukej si një protestë anti-kineze. Incidente të tilla ka pasur shumë në zonat tibetiane jashtë Tibetit, por këto ishin të parat që regjistroheshin në Lasa.
Një nga dy personat humbi jetën ndërsa tjetri u mbijetoi plagëve, njofton agjencia e lajmeve “Xinhua”, sipas të cilës të dy ata ishin nga zona jashtë Tibetit. Ndërkohë, një grua tibetiane, nënë e tre fëmijëve, ka vdekur pasi edhe ajo i vuri flakën vetes në provincën e Siçuanit.
Gruaja 30-vjeçare e kreu aktin e saj jashtë një manastiri në Aba, një zonë me etni tibetiane ku janë regjistruar shumica e vetëflijimeve. Transmetuesi amerikan “Radio Free Asia” raportoi se rreth 600 tibetianë janë vendosur përreth Lasës që kur ndodhi incidenti, ditën e diel.
Mediave të huaja u ndalohet të hyjnë në zonë dhe për rrjedhojë ato e kanë të vështirë të verifikojnë lajmet. Grupet tibetiane në kontakt me banorët e Lasës thonë se numri i viktimave nuk mund të konfirmohet.
Por Thubten Samphel, një zëdhënës për qeverinë tibetiane në ekzil në Daramsala, tha për BBC se tibetianët që nuk i përkasin Lasës janë arrestuar dhe kthyer në vendet e origjinës.
Top Channel
