Fuqitë perëndimore përjashtojnë diplomatët sirianë

Franca, Britania e Madhe, Gjermania, Italia, Kanadaja dhe Australia lajmëruan shpalljen “non grata” të ambasadorëve sirianë dhe diplomatëve të tjerë të lartë, të cilët duhet të largohen nga misionet e tyre brenda disa ditësh.

Pas Francës, Gjermanisë, Italisë, Australisë dhe Kanadasë edhe Shtetet e Bashkuara vendosën dëbimin e të ngarkuarit më punë të Sirisë në Uashington. Njoftimi i dëbimit të tij, u bë nga vetë Departamenti i Shtetit nëpërmjet një deklarate për mediat.

Këshilli Kombëtar Sirian, organizmi drejtues i opozitës së bashkuar vendase kundër presidentit Bashar al-Assad, përshëndeti vendimin e vendeve të Bashkimit Europian, Australisë dhe Kanadasë për dëbimin e ambasadorëve të Damaskut.

“Këshilli mbështet plotësisht vendimin për dëbimin e ambasadorëve të Sirisë dhe i kërkon Kombeve të Bashkuara miratimin e një rezolute që autorizon përdorimin e forcës ndërkombëtare për të ndalur gjakderdhjen dhe vrasjet në radhët e civilëve”, thuhet në deklaratën e Këshillit opozitar sirian.

Shumica e viktimave të masakrës së Hulës, ku përfshiheshin shumë gra dhe fëmijë, ishin ekzekutuar gjakftohtësisht.

Sipas banorëve, trupat paraushtarake të qeverisë hynë nëpër banesa duke qëlluar pa dallim ndaj çdo personi që ndodhej brenda.

Megjithatë, rrethanat e masakrës mbeten ende të paqarta, ndërsa ka spekulime se në të ishin të përfshirë edhe forcat kryengritëse.

Në një deklaratë të Ministrit të Jashtëm të Rusisë, Sergei Lavrov, ditën e hënë, u fajësuan të dyja palët për këtë ngjarje tronditëse.

Ndërkohë, ndërmjetësi i OKB-së për paqen, Kofi Annan, i cili ndodhet në Damask për bisedime, u takua me presidentin Bashar al-Assad, në praninë e të cilit dënoi me tonet më të ashpra ngjarjen e ndodhur.

Siria, Annan raporton në KS

I dërguari posacëm i Kombeve të Bashkuara për Sirinë, Kofi Annan do të raportojë ditën e mërkurë përpara Këshillit të Sigurimit mbi situatën e krijuar së fundmi në vend pas përshkallëzimit të dhunës, e sidomos masakrës së ndodhur në qytetin e Hulas.

Aktualisht Annan ndodhet në Siri ku ka patur takime me drejtues të lartë të vendit si dhe me presidentin Bashar al-Assad. Të mërkurën, në mbledhjen e Këshillit të Sigurimit të OKB-së, i dërguari i posacëm do të raportojë nëpërmjet një video-konference bashkë me nën/sekretarin Herve Ladsous.

Në 14 muaj revolta civile në Siri, më shumë se 10 mijë civilë kanë humbur jetën.

Top Channel