Një gjykatë në Turqi dënoi me dhjetë vjet heqje lirie një deputete dhe përfaqësuese të popullsisë kurde, për përhapje të propagandës në favor të Partisë së Popullit Kurd, e konsideruar nga Ankaraja një grupim terrorist.
Gjatë procesit të zhvilluar në qytetin juglindor të Dijarbakirit, Leyla Zana u gjet fajtore për shkelje të ligjit anti-terror të vendit.
Si anëtare e Parlamentit, ajo nuk mund të burgoset pasi është e veshur me imunitet. Megjithatë, dënimi do të hyjë automatikisht në fuqi në momentin që nuk do të jetë më deputete.
Shkeljet e Zanës i referohen nëntë fjalimeve të mbajtura në periudhën midis viteve 2007-08.
Zana konsiderohet si një heroinë nga komuniteti kurd, që përbën 10-20% të popullsisë së përgjithshme turke, për kurajon me të cilën ajo ka përfaqësuar problemat e këtij komuniteti.
Ajo ka krijuar më parë bujë edhe për faktin se është deputetja e parë kurde e zgjedhur në Parlamentin Turk, në vitin 1994. Gjatë betimit, atëherë ajo u shpreh në gjuhën kurde, ndonëse diçka e tillë është ilage. Zana ka mbështetur në të shkuarën edhe liderin e rebelëve kurdë, Abdullah Ocalan, i cili mbahet i burgosur në një qeli të vetme që prej vitit 1999.
Megjithatë, vendosmëria me të cilën Zana ka mbrojtur popullin e saj, e ka bërë atë që të konsiderohet në të shkuarën si një kandidate potenciale për fitimin e Çmimit Nobel.
Top Channel
