Polemikat për abetaren mbarëshqiptare

Në një seancë parlamentare ku po diskutohej për plotësimin e ligjit për veprimtari hulumtuese shkencore, deputeti opozitar i Rilindjes Demokratike Kombëtare, Izet Zeqiri, tha se zëvendës ministri Neziri u tregua i paaftë për të përfshirë edhe Maqedoninë në projektin për abetaren e përbashkët e unifikuar.

”Mendoj se Ministria e Arsimit dhe zv/ministri nuk mund të bëjnë diçka më tepër në hulumtimin shkencor dhe në kërkimet fondamentale apo aplikative, kur e dimë faktin se ata nuk kishin fuqi të përfshihet në projektin për abetaren e unifikuar. Kishte një lojë fjalësh mes zv/ministrit dhe ambasadorit shqiptar që akuzoi zv/ministrin”, deklaroi Izet Zeqiri, deputeti i RDK-së.
Edhe pse i pranishëm në seancë, zëvëndësministri i arsimit, Safet Neziri, heshti ndaj akuzave të drejtëpërdrejta në Kuvend.

Neziri, gjatë prononcimeve të mëparshme pati thënë se Maqedonia ka ngelur jashtë projektit për abetaren e përbashkët pasi nuk ka marrë ftesë nga Shqipëria dhe Kosova për t’iu bashkangjitur këtij projekti.

Por, pretendimet e këtilla të zv/ministrit të Safet Neziri janë hedhur poshtë nga ambasadori shqiptar në Shkup, Arben Çejku dhe ai kosovar Skënder Durmishi.

Diplomati shqiptar, z.Çejku ka i ka sygjeruar Nezirit të kontrollojë hapësirën ligjore për të bërë të mundur sjelljen e abetares edhe në Maqedoni, pasi sipas tij në në këtë vend mungon mbështetja ligjore nga Ministria e Arsimit për përdorimin e abetares së përbashkët.

Çejku ka thënë se Tirana është gjithmonë e gatshme të ndihmojë shqiptarët e Maqedonisë në të gjitha sferat.

Top Channel