Lunaçek: Kritikat e Thaçit, të drejta

Në një intervistë për “RTK”, Lunaçek ka bërë përgjegjëse disa vende të caktuara të Bashkimit Evropian, të cilat edhe pse e kanë njohur pavarësinë e shtetit të ri, po neglizhojnë përsa i përket proçesit integrues të tij.

“Unë pajtohem me deklaratat e kryeministrit dhe të gjithë ata që me njohin në Kosovë e dinë se unë e kam kritikuar BE-në dhe në veçanti disa shtete anëtare. Jo BE si Union, por disa shtete të bllokut nuk po tregojnë vullnet që të përshpejtojnë sa duhet premtimin për proçesin e liberalizimit të vizave. Dhe në këtë drejtim, Thaçi ka të drejtë kur kritikon”, ka deklaruar Lunaçek.

Përsa i përket veriut të Kosovës, eurodeputetja është shprehur kundër opsionit për një status special, duke vlerësuar se pakoja e Marti Ahtisarit përfshin një lloj autonomie si për pakicën serbe ashtu edhe për pakicat e tjera.

Nga ana tjetër, ajo ka kundërshtuar çdo mundësi për përdorimin e forcës në këtë zonë, duke nënvizuar se ndërhyrja ushtarake nuk është rruga e duhur për të zgjidhur problemin.

“Çdo përdorim i forcës në veri nga ana e qeverisë së Kosovës mund të prodhojë një konflikt të ri. Por, nëse kjo bëhet në rrugën e bisedimeve, që kosovarët të ulen në tryezë dhe t’ua shtrijnë dorën serbëve në veri, kjo do ta përjashtonte mundësinë e një konflikti të ri”, ka theksuar Lunaçek.

Më tej, pavarësisht se i ka mbështetur deklaratat e kryeministrit Thaçi, Lunaçek i ka kujtuar atij se edhe ai vetë duhet të respektojë detyrimet e marra përsipër karshi Brukselit, për implementimin e reformave që duhen për të përshpejtuar proçesin e liberalizimit të vizave dhe integrimit.

Top Channel