Banka e Anglisë uli parashikimet e saj për rritjen vjetore në 0,8% nga 1,2% që ishte parashikuar për 2012-n, duke theksuar se “stuhia” e Eurozonës përbën ende një kërcënim kryesor për rimëkëmbjen e Britanisë dhe të gjithë kontinentit.
“Eurozona është në një çast kritik të ekzistencës së saj dhe në qoftë se sistemi do të shpërbëhet, askush nuk mund të mendojë se meqë përdorim një monedhë tjetër, do të shpëtojmë nga rrjedhojat negative të krizës”, deklaroi guvernatori i Bankës, Sër Mervyn King.
Në një konferencë për shtyp ndërsa prezantoi informacionet për tremujorin e parë të 2012-s për ekonominë, Mervyn konfirmoi se Banka i ka të gatshme planet që do të zbatojë në rast të shpërbërjes së monedhës së përbashkët euro.
“Kërcënimi që vjen nga Eurozona është më i madhi edhe për rimëkëmbjen e ekonomisë britanike. Ekziston një rrezik i një stuhie që po i drejtohet ishujve tanë nga kontinenti. Jemi duke përjetuar krizën globale më të fuqishme që prej Depresionit të Madh të viteve 1930, me defiçitin më të madh fiskal në kohë paqeje dhe partnerët tanë më të mëdhenj tregëtar, ata që formojnë Eurozonën, janë të mbërthyer në një situatë që duket si e pazgjidhshme”.
Në fjalën e tij, guvernatori i Bankës së Anglisë gjithsesi theksoi se nuk ka një rrezik real për kalim në recesion të Britanisë së Madhe, ndërsa shtoi se objektivi për një inflacion më të ulët se 2% duhet të realizohet pa vështirësi.
Top Channel
