Fusnota, Kosova ende e izoluar

Ndonëse autoritetet kosovare shpresonin që me këtë prezantim Kosova të bëhej pjesë e të paktën 60 organizatave rajonale, deri tani vetëm 7 të tilla i kanë hapur asaj dyert.

Sipas “RTK”, këtë e ka konfirmuar numri dy i Ministrisë së Punëve të Jashtme, Petrit Selimi, i cili gjithësesi është shprehur optimist se deri në fund të vitit numri i aderimeve do të rritet, duke parë dhe kërkesat e shumta që janë bërë nga Prishtina.

“Deri tani nga Brukseli janë dërguar 27 kërkesa fillestare për një grup organizatash. Tani, kemi kërkuar nga ndërmjetësi Robert Cooper që të dërgojë raundin e dytë të kërkesave dhe presim që deri në fund të vitit Kosova të jetë në proçedurat e anëtarësimit në 50 ose 60 organizata e mekanizma rajonalë”, ka deklaruar Selimi.

Sipas tij, listën e organizatave ku Kosova synon të aderojë Ministria e Jashtme e ka hartuar në bashkëpunim me zv.kryeministren Edita Tahiri dhe ndërmjetësuesin e BE-së, Robert Cooper.

Pjesëmarrja në këto grupime prite të ketë vlerë konkrete ekonomike, tregtare dhe politike për shtetin e ri të Ballkanit, është shprehur zv.ministri i Jashtëm.

Më 24 shkurt në Bruksel, Prishtina dhe Beogradi arritën një marrëveshje për paraqitjen e Kosovës me një fusnotë të përbërë nga një asteriks, si dhe rezoluta 1244 dhe vlerësimi i GJND-së për pavarësinë.

Top Channel