Iran, humb jetën inspektori i OKB-së
08/05/2012 16:40
Analiza e VOA-s/ Qëndrimet e kandidatëve për president mbi çështjet kyçe të politikës së jashtme 25/06 22:29
Një inspektor i Kombeve të Bashkuara që po zhvillonte punën e tij mbikqyrëse në impiantet bërthamore të Iranit humbi jetën në një aksident rrugor, njoftoi Agjencia e Zhvillimit të Energjisë Atomike Iraniane.
Sipas të njëjtave burime, viktima është inspektori koreano-jugor, Ok-Seok Seo, i cili po udhëtonte bashkë me një inspektor tjetër nga kompleksi bërthamor i Khandab-it drejt provincës së Markazit në Iranin Qendror kur kanë pësuar një aksident me makinë.
Si pasojë e aksidentit, inspektori koreano-jugor ka humbur jetën, ndërkohë që kolegu i tij, identiteti dhe kombësia e të cilit nuk është bërë publik, ka mbetur i plagosur.
Ndërkohë, Agjencia Ndërkombëtare e Energjisë Bërthamore, ANEB, nuk ka konfirmuar akoma lajmin në fjalë.
Inspektorët e Kombeve të Bashkuara për energjinë bërthamore, ndodhen në Iran në kuadër të marrëveshjes së arritur mes Teheranit dhe 5+1 (SHBA, Rusi, Britani, Kinë, Francë dhe Gjermani) në Stamboll për programin atomik të Iranit që për Shtetet e Bashkuara dhe Perëndimin, po përpiqet të ndërtojë bombën bërthamore, ndërsa vetë Irani mbrohet duke thënë se programi i tij është tërësisht për qëllime paqësore.
Top Channel
