Shkup, BDI emëron Elenovskin

Reagime ka nxitur fakti që Elenovski është emëruar ambasador me propozim të partisë së Ali Ahmetit, BDI dhe ai do të bëhet ambasadori i parë maqedonas që propozohet nga një parti shqiptare, që nga pavarësia i Maqedonisë.  

“Tani në emër të integrimit, BDI do të emërojë kuadër për ambasador që nuk është shqiptar, në rastin konkret të Llazar Elenovskit i cili ka nënshkruar deklaratë për përkatësinë e tij entike në të cilën shkruan maqedonase, kjo është risi. Mbetet tani që BDI të zgjedh për lider ndonjë maqedonas që mund të quhet Tito dhe ta jetësoj vllazërim-bashkimin e komunizmit”, deklaron Zijadin Sela, deputet i PDSH-së.
Vendimi i BDI-së për të propozuar politikanin maqedonas për ambasador është kritikuar edhe nga Rilindje Demokratike Kombëtare.

“Kjo politikë kadrovike e BDI-së jep një mesazh shumë të keq për të gjithë ata të rinj shqiptarë të edukuar në sferën e diplomacisë të cilët janë të përgatitur për të pranuar sfidën që të jenë ambasadorë dhe të na përfaqësojnë jo vetëm shtetin e Maqedonisë, por edhe të përfaqësojnë interesin shqiptar në këto qendra botërore”, thotë Izet Zeqiri, deputet i RDK-së.

Llazar Elenovski ka qenë Ministër i Mbrojtjes në Qeverinë e parë të kryeministrit Nikolla Gruevskit nga viti 2006-2008, ndërsa aktualisht kryeson klubin euroatlantik të Maqedonisë. Elenovski do të zëvendësojë diplomatin shqiptar Muhamed Halili, i cili deri më tani ka ushtruar postin e ambasadorit të Maqedonisë në Belgjikë.

Top Channel